Publiká riba 18 Ougùstùs 2025
Willemstad – Resientemente un total di 41 partisipante a finalisá e kurso di ‘Rijdend met Kompas’ sertifikado A i B pa sea shofùr di taksi, bùs òf ‘tour bus’ ku éksito . E kurso a keda organisá pa Ministerio di Tráfiko, Transporte i Planifikashon Urbano (VVRP) den estrecho kolaborashon ku Ofisina di Turismo di Kòrsou (CTB).
Durante un seremonia ameno, Minister di Tráfiko, Transporte i Planifikashon Urbano, sr. Charles Cooper akompañá pa Minister di Desaroyo Ekonómiko sr. Roderick Middelhof i tambe sr. Cithree Heydoorn, Minister di Enseñansa, Sensia, Kultura i Deporte (OWCS) a hasi entrega di sertifikado na e partisipantenan.
Na febrüari 2025 e kurso di transporte públiko ‘Rijdend met Kompas’ sertifikado A i B a kuminsá i a terminá na Yüli 2025 ku e último ‘herkansing’.
Meta di e kursonan tabata pa duna oportunidat pa bira un shofùr profeshonal di transporte públiko, sea pa kore taksi, bùs òf tour bus. E kurso ta konsistí di diferente tema ku ta di importansia pa e shofùr profeshonal, manera entre otro; 3 diferente idioma, hulandes, spañó i ingles tantu verbal komo por eskrito, lei di transporte, negosiashon, servisio di kalidat, étika, maneho di emoshon, turismo resiliente i diferente módulo mas. E kurso a tuma lugá na Universidat di Kòrsou (UoC) i a keda kordiná den su totalidat pa Nostra Growth ku ta e instansia sertifiká pa Ministerio di Enseñansa pa duna e kurso di transporte.
Na 2022, CTB a introdusí Nostra Growth na UOVV, kual a demostrá di por duna e kursonan. Na 2024 Nostra Growth a risibí ofisialmente e ‘ministeriele beschikking’ i tambe lisensia di Rijdend met Kompas A & B for di gobièrnu.
Por tuma nota ku mas hóben ta skohe pa bira shofùr profeshonal. Sr. Charles Cooper, Minister di Tráfiko, Transporte i Planifikashon Urbano i tambe tur sobrá partido a indiká di ta hopi orguyoso di esaki i ta aploudí ku esnan mas yòn ta mirando futuro den sektor di transporte i tambe turismo.
VVRP/OUVV, CTB, OWCS, Nostra Growth i UoC ta felisitá tur partisipante ku a terminá e kurso ku éksito, spesialmente esnan ku a destaká. Alabes ta deseá nan, tur kos bon den nan karera komo shofùrnan profeshonal di transporte públiko ku lo ofresé servisio di kalidat.
