Ta nivelá tur DJ i agrupashon musikal na kuminsamentu di tur marcha.

Nivel máksimo di zonido permití durante marchanan di Karnaval ta 100 Desibèl

Willemstad – E aña aki meskos ku añanan anterior, nivel máksimo di zonido permití durante tur marcha di Karnaval ta 100 Desibèl. Pa organisá Karnaval e organisadó den e kaso aki Fundashon JAG, mester pidi un pèrmit kual ta keda otorgá pa Polis. Den e pèrmit aki tin un kantidat di regla na kua e organisadó i gruponan mester tene nan mes na dje. Un di e reglanan aki ta nivel máksimo di zonido permití. Sekshon di Medio Ambiente i Naturalesa tin e tarea pa midi zonido komo nan tin ekspertisio i ta disponé di e aparatonan pa hasi e trabou.

E aña aki tambe lo hasi uzo di e aparato MeTrao ku awendia ta e sistema mas uzá pa maneho di zonido durante konsiertonan i festivalnan riba nivel mundial. E sistema aki ta duna oportunidat pa midi i manehá zonido for di distansha, pues no ta nesesario mas pa midi for di pòstnan fiho riba ruta di Karnaval. E bentaha di e sistema aki ta ku DJ nan i agrupashonnan no por baha zonido momentu ku ta aserkando un pòst di midimentu i hisa zonido bèk despues di a pasa e pòst. Na kuminsamentu di marchanan na altura di pòmp di gasolin di Sta. Maria tin inspektornan i miembronan di AMAK presente pa huntu ku DJ òf agrupashon musikal pone e zonido na nivel di Desibèl permití momentu ku nan ta pasando.

Inspektornan ku ta midi zonido tin kontakto direkto ku komando sènter i Polis. Lo notifiká Polis momentu ku un Inspektor mester intervení pa baha nivel di zonido. Promé biaha ku intervení ta djis pidi pa baha zonido sin konsekuensha. Di dos intervenshon serka mes DJ òf agrupashon musikal lo mèldu esaki na komando sènter i konsekuentemente Polis lo por tuma medidanan nesesario. Den e kaso aki Polis por tuma e desishon pa para e músika pa motibu di negligensha di reglanan stipulá den pèrmit. Ministerio di Salú, Medio Ambiente i Naturalesa ta rekomendá tur hende i sigur nos muchanan, pa hasi uzo di protekshon di oido i mantené distansha responsabel for di spikernan.