Den kuadro di dia internashonal di empresanan mikro, chikí i mediano 2024
Willemstad, 26 di yüni 2024 – Riba proposishon di Ministerio di Desaroyo Ekonómiko (MEO), Konseho di Ministernan ta aprobá 27 di yüni komo Dia di Empresario na Kòrsou. Di akuerdo ku Minister di Desaroyo Ekonómiko, Ruisandro Cijntje, aprobashon di 27 di yüni komo dia di Empresario na Kòrsou, ta re-afirmá su kompromiso pa sigui krea maneho, i fasilitá e klima di invershon i finansiamentu pa sostené empresarionan pa un futuro sostenibel, dunando un man na esnan mas vulnerabel i kreando un kaminda pa un forma di biba mas sostenibel i próspero pa un i tur. MEO ta sumamente kontentu di konta ku sosten i aprobashon di ADECK, ku ta mira ku entusiasmo riba preparashon di selebrashon di e fecha aki den futuro.
Empresanan mikro, chikí i mediano ta wes’i lomba di nos ekonomia
Netamente relashoná ku dia internashonal di empresanan mikro, chikí i mediano 2024, Minister Ruisandro Cijntje, ta para ketu na empresarionan i rekonosé e ról determinante ku nan tin den e proseso di rekuperashon i kresementu di nos ekonomia. Di akuerdo ku estadístika na Kòrsou, 98% di empresanan ta empresanan mikro, chikí i mediano; nan kontribushon na GDP di Kòrsou ta 30% i na merkado laboral 60%. Esaki ta mustra ku e empresanan aki ta duna kontribushon vital pa krea kupo di trabou, impulsá kresementu ekonómiko i empoderá gruponan vulnerabel.
No opstante e ròl asina importante ku e empresanan aki tin, Minister Cijntje a indiká di ta rekonosé ku ainda falta hopi apoyo adekuá. Esaki ta bini dilanti tambe den e tema ku Nashonnan Uní a skohe e aña aki pa para ketu na dje riba dia Internashonal di Empresanan Mikro, Chikí i Mediano. E tema ta: Probechá di e Poder i Resiliensia di Empresanan Mikro Chikí i Mediano pa Aselerá Desaroyo Sostenibel i Eliminá Pobresa den tempu di vários krísis.
Inisiativanan pa sostené empresarionan
Di akuerdo ku Minister Cijntje, MEO ta trahando riba diferente inisiativa pa sostené i fasilitá empresarionan den diferente sektor i riba diferente tereno. Entre otro, kursonan di kapasitashon pa empresarionan pa diferente sektor, manera sektor agrario i sektor di turismo. Tambe Minister a indiká ku MEO a kolaborá ku Qredits pa pone un fondo agrario disponibel pa empresarionan. MEO a sòru tambe pa awa pa irigashon via Aqualectra, un database agrario, i un WhatsApp Group “Fruta i berdura protehá”. Pa den futuro MEO ta trahando riba klasifikashon di produktonan agrario, konsepto di lei pa ampliashon lista di produkto protehá i konsepto di lei pa tarifa mínimo.
Un otro aspekto ku Minister Cijntje a para ketu na dje ta e echo ku nos strategia di eksportashon ta dirigí riba nos empresarionan mikro, chikí i mediano pa fasilitá nan akseso na merkadonan internashonal den 7 sektor di enfoke. Den e kuadro aki, resientemente, a habri Curaçao Music Export Office pa fasilitá nos empresarionan den e área di músika i a lansa e strategia di Medical and Wellness Tourism Export Strategy ku ta dirigí riba nos empresarionan ku ta aktivo den e área di bienestar.
Otro inisiativa ku MEO a bini ta kontribuí na dje, ta Curaçao Innovation Award. E award ta keda otorgá pa di 25 aña. Esaki ta pa stimulá mas inovashon i digitalisashon bou di empresarionan. MEO ta trahando tambe riba Mi NEGOSHI Shared & Support Services, pa yuda empresarionan mikro, chikí i mediano pa manehá nan negoshi ku éksito pa medio di konseho práktiko i kapasitashon.
Pa konkluí, Minister Cijntje a remarká ku e ta konsiente ku tin hopi mas pa hasi, i el a hasi un invitashon na otro ministerionan, sektor privá, otro stakeholdernan relevante i komunidat pa na un manera sano sigui hiba e diskushon kon nos por sostené empresarionan mihó i kumpra lokal!
Minister ta ekstendé felisitashon na tur empresario di Kòrsou i ta deseá nan hopi sabiduria i fortalesa pa sigui perseverá den nan lucha pa éksito di nan kompania, kontribushon na ekonomia di Kòrsou i prosperidat di nos komunidat.
