Akuerdo ku FIT i partisipashon na WBC 2026

Minister van Heydoorn ta biaha pa Miami pa firma MOU i
apoyá ekipo den World Baseball Classic (WBC2026)

WILLEMSTAD – Den e periodo di 5 te ku 9 di mart 2026, Minister di Enseñansa, Siensia, Kultura i Deporte, sr. Sithree van Heydoorn, lo tin un biahe di trabou na Miami. Minister ta keda kompañá pa, entre otro, direktor di “Stichting Studiefinanciering Curacao”, sr. Sidney Justiana.

Durante di e biahe di trabou aki, minister ta:

1. Firma un Memorandum of Understanding (MoU) ku Florida Institute of Technology (FIT);
2. Presensiá weganan di e selekshon di Hulanda durante e World Baseball Classic 2026 (WBC).
   • E MoU ku lo firma ku FIT ta brinda nos studiantenan:

• • • Kosto di “Tuition fee” mas favorabel;
    • Interkambio di konosementu i eksperensia;
    • Fortalesé relashonnan akadémiko internashonal;
    • Stimulá desaroyo di talento lokal riba nivel internashonal;
    • Amplia oportunidat pa nos hóbennan por sigui estudio superior na Merka.

Firmamentu di e MoU aki ta danki na trabounan inkansabel di nos flamante minister plenipotensiario na Washington, sr. Jèrôme Beeldsnijder. E kolaborashon aki ta kuadra ku e maneho di gobièrnu ku ke stimulá siñamentu den region, di moda ku nos hóbennan por keda mas serka banda di kas durante nan formashon. Na mes momento esaki ta garantisá mihó oportunidat pa nan bolbe Kòrsou pa sigui kontribuí na desaroyo di nos pais. Banda di firmamentu di e MoU, Minister ta presensiá partidonan di e selekshon di Hulanda na e torneo di WBC 2026 na Miami. Partisipashon di e selekshon aki tin un balor speshal pa Kòrsou, pa motibu ku mayoria di e hungadónan ta nativo di Kòrsou i ta bou di liderato di nos manager “Hall of Famer” Andruw Jones.

Presensia di minister enkargá ku deporte ta mustra e balor ku Gobièrnu ta duna na deporte komo un instrumento pa inspirá nos hóbennan, fortalesé orguyo nashonal i pone Kòrsou mas visibel riba mapa internashonal. E biahe aki ta reflehá e vishon stratégiko di ministerio di Enseñansa, siensia, Kultura i Deporte, kaminda enseñansa, desaroyo di talento i deporte ta kana huntu.

Tantu e kolaborashon akadémiko komo e sosten na deporte internashonal ta kontribuí na desaroyo integral di Kòrsou su ekonomia i turismo.
—
Sr. Sithree van Heydoorn
Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte