CHICOS 2025: Promé Minister Pisas ta resaltá Kòrsou komo partner konfiabel den turismo Karibense

WILLEMSTAD – Durante e Caribbean Hotel Investment Conference & Operations Summit (CHICOS 2025), tumando lugá e aña aki na Marriott Beach Resort na Piscadera, Promé Minister Gilmar Pisas a deklará ku dor di organisá CHICOS 2025 na Curaçao, e isla ta demostrá ku e no ta solamente un destinashon atraktivo pero tambe un partner konfiabel i ku mira riba futuro  pa loke ta trata un desaroyo duradero di turismo Caribense. Promé Minister Pisas despues a presentá e vishon di e pais pa un era nobo di kresementu sostenibel, diversifikashon ekonómiko i kooperashon regional.

Den su diskurso Promé Minister a enfatisá ku Kòrsou ta den un fase desisivo di modernisashon i renovashon di su forsa ekonómiko. Den añanan resien,  Gobièrnu a enfoká riba reformanan, rekuperashon ekonómiko i stabilidat polítiko, ku a pone e fundeshi pa un ekonomia mas resiliente. Den e konteksto aki,  Gobièrnu a traha konsientemente pa redusí burokrasia den proseduranan pa duna pèrmit i krea un asina yamá “ekonomia di tapeit kòrá”,un klima di invershon ku ta kombiná konfiabilidat, transparensia i velosidat.

Promé Minister Pisas a indiká ku Kòrsou ta posishonando su mes komo un hub multi sektoral pa turismo, energia, servisionan maritimo, industria i actividatnan finansiero, enfatisando ku e desaroyo aki ta enserá un progreso balansá: ekspansion ekonómiko ku enfoke riba konservashon di naturalesa, herensia kultural i koheshon sosial. Segun Promé Minister Pisas, e isla ta trahando pa promové energia sostenibel, normanan di edifisio bèrdè, i invershonnan ku ta konektá inovashon ku hasimentu di negoshi ku ta konsiente di medio ambiente.

Promé Minister Pisas a indiká ku e organisashon di CHICOS 2025 na Kòrsou ta un konfirmashon di e konfiansa ku partnernan internashonal tin den rumbo di nos pais. Organisashonnan manera CINEX i Ofisina di Turismo di Kòrsou (CTB) ta hunga un ròl klave den esaki dor di guia invershonistanan i fortalesé e posishon di Kòrsou mundialmente komo un destinashon konfiabel pa turista i pa invershonnan den e sektor turístiko. Segun Promé Minister Pisas, Kòrsou tin komo meta pa sigui desaroyá komo un hub regional den e próksimo añanan, aprobechando su ubikashon stratégiko entre Latino Amerika, Norte Amerika, y Karibe, i tambe su konekshon direkto ku Union Europeo via Reino Hulandes. E retonan i oportunidatnan den turismo Karibense ta rekerí esfuersonan konhunto. Finalmente Promé Minister Pisas a enfatisá e importansia di kooperashon den nos region. Kòrsou kier hunga un ròl aktivo den esaki, enfoká riba un kresementu  kompartí y benefisio mutuo.