Publiká riba 14 Yanüari 2026
Willemstad – Siman pasá, Gobièrnu di Merka a aprobá e transporte i almasenamentu di mas o ménos 50 mion bari di krudo Venezolano den region Karibe, ku e propósito pa bende e volúmennan aki posteriormente riba e merkadonan internashonal, spesialmente na Merka, Europa i Asia. Den e kuadro aki, Bullenbaai na Kòrsou a wòrdu designá komo un di e terminalnan di almasenamentu i distribushon. E kompanianan ku ta hasi uso di e servisionan di e terminal na Bullenbaai ta Trafigura i Vitol, dos kompanianan internashonalmente renombrá, ku ta responsabel pa transporte i komersialisashon di volúmennan konsiderabel di krudo riba nivel mundial.
Gobièrnu ta anunsiá ku awe e promé tankero, MV Regina, a yega Kòrsou ku krudo Venezolano destiná pa ser almasená na Bullenbaai. E yegada di e barku aki ta marka un momentu importante pa e sektornan energétiko i portuario na Kòrsou i ta indiká un paso konkreto den e reaktivashon di nos ròl den e kadena logístiko internashonal di energia.
E desaroyo aki ta enfatisá tambe e importansia stratégiko di Kòrsou, tantu dor di su posishon geográfiko komo dor di su infrastruktura petrolero di kalidat haltu. Alabes, e ta representá un oportunidat nobo pa nos isla por bolbe utilisá aktivamente su kapasidatnan logístiko na benefisio di desaroyo ekonómiko i empleo.
Un palabra di apresio i enkurashamentu ta bai pa e maneho i empleadonan di 2BAYS i CRU, pa nan profeshonalismo, determinashon i trabou intensivo. E desaroyo aki ta konfirmá ku Kòrsou tin e kapasidat pa reakshoná rápidamente riba oportunidatnan geo-polítiko i geo-ekonómiko, i pa tradusí nan den benefisio real pa nos ekonomia. Nos fasilidatnan portuario, kapasidat di almasenamentu i ekspertisio logístiko ta representá un balor stratégiko ku ta wòrdu rekonosé, no solamente regionalmente, sino tambe na nivel global.
Basá riba e posishon geográfiko stratégiko di Bullenbaai i su kapasidat pa akomodá e barkunan di mas grandi di mundu, ta wòrdu antisipá ku den e próksimo periodo mas barkunan lo sigui yega Kòrsou. Gobièrnu ta mira e desaroyo aki ku gran satisfakshon, ya ku e ta reafirmá Kòrsou su ròl komo un partner konfiabel, profeshonal i stratégiko den e kadena internashonal di energia i komersio, i ta fortifiká mas ainda su posishon komo sentro logístiko den region Karibe.
