Publiká riba 27 Novèmber 2025
Willemstad – Ayera, 26 di november, Minister Middelhof tabatin un kombersashon balioso ku e Embahador di Suesia Julius Liljestrom tokante nos ambishonnan kompartí den sostenibilidat, inovashon i desaroyo di nos isla. Suesia i Korsou por ta leu for di otro, pero nos ta komparti e mesun vishon pa futuro: un ekonomia fortifika dor di kresementu berde, energia renobabel, i solushonnan inteligente pa islanan chikitu.
Nan a trata, entre otro, oportunidatnan den e áreanan di transishon energétiko, ekonomia sirkular, turismo sostenibel, i interkambio di konosementu entre komunidatnan insular. E similaridatnan entre nos paisnan, spesialmente den kon nos ta manehá espasio limitá, rekursonan natural, i retonan di klima, ta proveé un fundeshi fuerte pa mas kolaborashon.
Minister Middelhof ta ansioso pa profundisá e relashon aki i konhuntamente krea oportunidatnan nobo pa desaroyo sostenibel i progreso ekonómiko na Kòrsou.
