Publiká riba 20 Yanüari 2026
Diálogo konstruktivo a tuma lugá i a fiha fecha pa próksimo reunion
Willemstad – Promé Minister Pisas, den su kalidat komo Minister di Hustisia suplente awe djamars 20 di yanüari 2026 a tene un reunion ku sindikato ABVO pa trata inkietutnan relashoná ku situashon aktual na Brantwer Kòrsou. E reunion aki a ser yama despues ku djabièrnè 16 di yanüari 2026, sindikato ABVO a pidi un reunion ku karakter di urgensia serka e titular di hustisia pa por atendé algun punto di atenshon ku nan miembronan kier a trese dilanti. Sinembargo debí na múltiple kompromiso, entre otro ku Parlamento, sr. Pisas no tabata por a sinta ku e sindikato i a duna oido awe djamars pa por a skucha e inkietutnan. E reunion di awe a kana den un atmósfera agradabel i konstruktivo, kaminda diálogo habrí i rèspèt mutuo a prevalesé.
Durante aña 2025, Brantwer Kòrsou a logra vários progreso importante den su mishon pa protehá bida, propiedat i komunidat. Den total, Brantwer a atendé 951 insidente, ku ta inkluí tantu kombatimentu di kandela, asistensia tékniko, komo otro tareanan di sosten, inkluí asistensia durante aksidentenan den tráfiko.
Pa fortalesé kapasidat operashonal Brantwer Kòrsou a:
• Risibí mas personal nobo, inkluí preventistanan i sentralistanan, ku a drenta servisio pa aliviá e fluho di petishon i kontribuí den konseho riba riesgo di kandela, konsientisashon na komunidat i sosten na kuerpo.
• Pone fondonan disponibel pa rekonstrukshon di diferente pòst di bombero.
• Hasi destaho públiko i hasi pedido di 3 brantspùit, 1 vehíkulo pa asistensia i 1 tènker, i invertí den material i ampliashon di e flota di vehíkulo.
• A hasi apertura di lokalidat pa entrenamentu di e bomberonan, pa asina mehorá nan kapasidat i preparashon.
E personal di Brantwer tambe a partisipá na diferente estudio i kurso, tantu lokal komo internashonal, pa amplia nan konosementu i fortifiká e kuerpo.
Pa fortalesé e ròl preventivo tambe, Brantwer su departamentu di prevenshon a:
• Hiba un kampaña di prevenshon pa konsientisá komunidat tokante kandela i kalamidat, ku repartishon di alrededor di 2500 detektor di huma.
• Realisá kòntròl multidisiplinario i duna mas di 400 konseho den proseso pa saka diferente pèrmit, asina reforsá seguridat i prevenshon den komunidat.
E logronan di 2025 ta reflehá e dedikashon i profeshonalismo di Brantwer Kòrsou, i ku Gabinete Pisas III ta sigui komprometí na sostené i desaroyá e kuerpo, den interes di e komunidat.
Durante di e reunion, a trata tres (3) punto prinsipal ku ABVO a presentá. Esakinan ta: (1) personal ku ta wòrdu ekskluí di traha overtaim despues di a bishita reunion di sindikato, (2) personal di kantor ku ta traha den warda, i (3) kartanan di diferente inkietutnan ku sindikato ABVO tin, kual vários a keda atendé pero no ta tur a logra yega na solushon pa nan ainda, pero ku sinembargo ta trahando riba nan.
Den e reunion, a atendé riba e puntonan presentá i a yega na vários palabrashonnan entre sindikato ABVO i e tim di maneho di Brantwer Kòrsou, ku komo meta pa fortalesé e kolaborashon i garantisá un bon funshonamentu di e organisashon. Un di e puntonan I tambe karta di 2023 ainda ta rekerí mas aklarashon. Pa esei, Promé Minister a invitá sindikato ABVO pa un próksimo reunion denter di un siman, kaminda Minister di Hustisia tambe lo ta presente pa por trata e punto pendiente na un manera integral.
Gobièrnu ta keda komprometé na mantené diálogo kontinuo ku e sindikatonan i na buska solushonnan duradero, den interes di e personal di Brantwer i di komunidat.
