Publiká riba 17 Novèmber 2025
Willemstad – Djabièrnè 14 di novèmber último, Promé Minister Gilmar Pisas a risibí e Komishon di Kondekorashon Real, ku durante e bishita a hasi entrega di e proposishonnan pa 14 kandidato ku lo risibí un Kondekorashon Real na luna di aprel 2026.
Un Kondekorashon Real ta un distinshon ofisial ku Su Mahestat Rei Willem-Alexander ta otorgá na siudadanonan den Reino ku a kontribuí òf a hasi aportashon eksepshonal na bienestar di komunidat òf grupo den komunidat. Despues ku siudadanonan na Kòrsou a proponé un kandidato pa risibí un kondekorashon real, e Komishon ta analisá e proposishon i ta duna su konseho na Konseho di Minister di Kòrsou. E Komishon mes no ta disidí riba un petishon, pero ta hasi rekomendashon na Gobièrnu basá riba un manual ku nan ta mantené pa evaluá tur petishon.
E lista di kandidatonan ku Konseho di Minister a aprobá ta wòrdu transmití pa Su Ekselensia Gobernador di Kòrsou, ku ta manda esaki pa Gobièrnu di Hulanda pa e desishon final. E seremonia ofishal lo tuma lugá dia 26 di aprel 2026, un dia promé ku Dia di Rei 2026.
E Komishon di Kondekorashon Real di Kòrsou ta wòrdu nombrá dor di Promé Minister via un dekreto nashonal pa un periodo di tres aña. Ku entrega di e proposishonnan pa kondekorashon 2026, e periodo di e Komishon aktual a yega na su fin. E miembronan saliente ta:
– Sra. Lusette Verboom-Fairbairn, presidente
– Sr. Trevor Bakhuis
– Sra. Marisol Roosberg
– Sr. Eithel Hato
– Sra. Maria Liberia-Peters
Durante e reunion, Promé Minister Pisas a interkambiá ku e Komishon tokante e desaroyonan, e retonan i nan éksitonan durante e último tres añanan ku nan a sirbi nos pais ku kompromiso, dedikashon i profesionalismo. Ta p’esei Promé Minister Pisas a ekspresá su profundo gratitut na tur miembro di e Komishon pa nan kontribushon na nos komunidat.
Finalmente, Promé Minister Pisas ta indiká: “E labor ku e Komishon di Kondekorashon Real ta hasi ta di gran balor pa nos komunidat; esta prepará proposishonnan pa rekonosé siudadanonan di Kòrsou ku a kontribuí den manera eksepshonal na buena marcha, desaroyo òf bienestar di nos pueblo i pais.”
