Publiká riba 05 Novèmber 2025
Willemstad – Promé Minister Gilmar Pisas a tene un konsulta periódiko awe riba nivel di mandatario ku e Sekretario di Estado pa Asuntunan Interior y Relashonnan den Reino, señor E. van Marum. Durante e konsulta a papia riba Landsontvanger, Banko Sentral di Kòrsou en Sint Maarten (CBCS) i ehekushon di e reformanan den e asina yamá Pakete di Pais.
Sekretario di Estado Van Marum a indiká ku, den kuadro di bon gobernashon y un maneho finansiero sano, Gobièrnu Hulandes ta hopi interesá den e resolushon di e problemanan rondó di Landsontvanger dor di Gobièrnu di Kòrsou. Relashoná ku esaki Promé Minister Pisas a indiká ku e situashon na Landsontvanger a stabilisá despues ku Gobièrnu a tuma e medidanan nesesario. Sekretario di Estado Van Marum a ofresé Promé Minister Pisas sosten di personal pa e investigashonnan hudisial andando, si esei ta nesesario.
Pa loke ta trata e nombramentu di komisarionan na CBCS, Promé Minister Pisas a indiká ku, mirando ku Kòrsou i Sint Maarten a bira paisnan outónomo i ta kompartí un banko sentral komun, e proseduranan pa nombramentu di komisarionan ta un reto partikular pa ámbos pais i ku mester buska un solushon permanente pa esaki. E mandatarionan a enfatisá mas aleu ku nan ta keda kompletamente komprometé ku implementashon di e Pakete di Pais, pero ku sierto ahustenan i prioridatnan lo mester tuma lugá na 2026, ku atenshon partikular na vários proyektonan ku ta rekerí tumamentu di desishon ministerial.
E reunion a tuma lugá den un ambiente konstruktivo i habrí.
