Minister Boekhoudt a hasi un bishita di introdukshon na Curaçao International Clinic (CIC), situá na Landhuis Pos Cabai

Willemstad – djamars 27 di yanüari 2026, Minister a haña un rekorido rònt e klínika pa asina por a haña un bon bista di e diferente servisionan médiko ku e klínika ta ofresé aktualmente. E servisionan ku CIC ta ofresé ta:

• Ortopedia, ku enfoke riba remplaso di hep i rudia;
• Kuido di doló (Pain Clinic), kaminda doló króniko ta wòrdu tratá ku metodonan moderno i multidisiplinario, basá riba e eksperensia di Dr. Sahoury;
• Dermatologia, pa trata kondishonnan médiko di kueru manera akné i ekzema, pero tambe kosmetologia pa tratamentunan estétiko;
• Oftalmologia, un servisio ku ta wòrdu desaroyá aktualmentu, ku enfoke riba, entre otro, operashonnan di katarata.
• Radiologia; aki e pashèntnan por hasi test di DEXA pa midi densidat di wesunan I pronto lo por saka potrèt di radiologia.

E kuido spesialisá aki ta kontribuí di manera importante na mehorashon di kalidat di bida di pashèntnan na Kòrsou i tambe ta yuda ku redukshon di lista di pashènt i tempu di espera den e sektor di kuido.

Komo Minister di Salubridat Públiko, Medio Ambiente i Naturalesa, Minister Boekhoudt ta keda komprometé pa sigui traha na mehorashon di kuido di salú públiko ku yudansa di instansianan públiko i privá, kaminda kolaborashon, kalidat i aksesibilidat ta sentral.

Danki na e tim di Curacao International Clinic bou di liderazgo di Dr. Pascal Sahoury pa e bon risibimentu i e splikashon.

MAS NOTISIA

Ministerio konserní: Salubridat Públiko, Medio Ambiente i Naturalesa