Publiká riba 02 Mart 2026
Willemstad, 2 di mart 2026 – Minister Boekhoudt (GMN) a firma awe e dekreto ministerial pa prolongá e pèrmit di Fundashon Kuido di Ambulans Kòrsou (FKAK) te ku 31 di desèmber 2026.
Ku e desishon aki, gobièrnu ta garantisá e kontinuidad di kuido di ambulans, mientras ta sigui traha duru riba un reforma struktural i profeshonalisashon di e sektor.
A designá aña 2026 komo un aña di transishon. Den e periodo aki, kuido di ambulans lo wòrdu optimalisá mas aleu i prepará pa e transishon pa un entidat nobo i profeshonal bou di Ministerio di GMN entrante prome di yanüari 2027.
Minister Boukhoudt ta enfatisá ku e kuido di ambulans lo keda full operashonal durante e transishon:
“E seguridat di nos poblashon ta semper prioritario. Kuido di ambulans mester ta konfiabel, profeshonal i kla pa futuro. Ku e dekreto aki, nos ta garantisá e kontinuidat i nos ta duna e pasonan nesesario pa fortalesé e organisashon duraderamente.”
E kuido di ambulans lo keda disponibel 24 ora pa dia, 7 dia pa siman for di tres post na Kòrsou, ku mínimo kuater ambulans operashonal i personal kualifiká konforme e rekisitonan legal.
Ku e prolongashon aki, gobièrnu ta ehekutá e desishon tumá anteriormente pa modernisá e kuido di ambulans strukturalmente, organisá esaki di un manera mas transparente i laga esaki kuadra mihó ku e nesesidat di kuido di nos komunidat.
