Publiká riba 20 Yanüari 2026
Wilemstad – Djamars 20 di yanüari, e minister nobo di Salubridat públiko, Medio Ambiente i Naturalesa a hasi su promé bishita di trabou serka e tim di maneho i personal di e Ministerio di GMN. Durante su bishita, minister Boekhoudt a interkambiá informashon ku e tim di maneho riba diferente tema ku ta regardá Salubridat públiko. Tambe a identifiká prioridatnan den e maneho di Salubridat públiko i a hasi sierto palabrashonnan tokante asuntunan pendiente den e sektor. Minister Boekhoudt a indiká ku lo pone atenshon inmediato riba medidanan pa prevenshon di malesa, bahamentu di listanan di espera i fortifikashon di e promé liña di kuido aki na Kòrsou.
Te ku fin di luna aki minister Boekhoudt lo bishitá diferente entidatnan den e sektor di kuido pa sera konosí ku nan i tuma nota di asuntunan ku tin ku haña atenshon di parti di Gobièrnu.
