Publiká riba 22 Yanüari 2026
Willemstad – Djaweps 22 di yanüari último Minister Boekhoudt di Salubridat públiko, Medio Ambiente i Naturalesa a bishitá gerensia di Banko di Seguro Sosial (SVB). Durante e bishita a papia riba diferente tema ku ta regardá e situashon den sektor di kuido i ku tin atenshon di tantu minister Boekhoudt komo di SVB. Algun tópiko sentral den e kombersashon tabata un plan di mas aña pa prevenshon di malesa, restrukturashon di kuido primario na Kòrsou, bahamentu di listanan di espera di CMC i gastunan médiko di personanan indokumentá. A palabrá ku proksimamente lo kuminsa deliberá ku otro riba e akshonnan ku mester wòrdu tumá pa trese e solushonnan nesesario den kada área di maneho di salubridat ku SVB ta atendé pa Gobièrnu, ku enfoké riba bahada di listanan di espera pa spesialistanan i pa operashon na Curaçao Medical Center (CMC).
