Publiká riba 31 Mart 2026
Harderwijk, Hulanda – Minister di GMN Tyron Boekhoudt, huntu ku un delegashon di Kòrsou, a hasi un bishita strategiko na “Academie voor Ambulancezorg” na Harderwijk, Hulanda. E bishita aki ta forma parti di e esfuerso di gobiernu pa modernisá i fortalesé kuido di ambulans na Kòrsou, ku enfoke riba kalidat, profesionalisashon i sostenibilidat.
Kuido di ambulans mester un fundeshi mas fuerte, ku strukturanan kla, protokòlnan moderno i personal mas miho prepará. E akademia na Hulanda ta sirbi komo un ehèmpel di kon un sistema di kuido di emergensia por wordu organisá riba base di kompetensianan, protokolonan i kontrol di kalidat.
Durante e bishita, e delegashon a papia riba implementashon di strukturanan di formashon pa enfermeronan i chauffeurnan di ambulans, definishon di kompetensia mínimo, i kon nos komo Kòrsou por adaptá e mihó praktikánan internashonal pa nos propio realidat.
Ademas, a eksplorá posibilidatnan konkreto pa kolaborashon struktural, inkluyendo programa di formashon, guia profesional i transferensia di konosementu. Tambe a evaluá modelo híbrido i trayektonan gradual pa implementashon, pa asina logra resultadonan realistiko i sostenibel.
E bishita aki ta konkretisá ku Minister Boekhoudt ta komprometé pa subí e nivel di kuido di emergensia na Kòrsou. No solamente pa situashonnan di krísis, pero pa prevení, prepará i garantisá ku kada siudadano por konta riba kuido rápido, profeshonal i di kalidat.
Ku e paso aki, Minister Boekhoudt ta sigui traha riba un sistema di salú mas fuerte, mas organisá i mas resiliente pa tur nos mes hende nan i tambe nos bishitantenan.
