Publiká riba 09 Febrüari 2026
Willemstad, Kòrsou – Djabièrnè 9 di yanüari 2026, Minister di Hustisia mr. Shalten Hato a tene un seshon stratégiko ku e kadena hudisial, ku partisipashon di tur tim di maneho i representantenan di e diferente organisashonnan hudisial. E seshon a sirbi komo un momento klave pa evaluashon, kordinashon i planifikashon stratégiko pa aña 2026.
Un di e tópikonan mas importante ku a wòrdu trata durante e seshon tabata finansa di Pais i e impakto ku esaki tin riba e operashon di Gobièrnu. Den esaki, a elaborá kiko Ministerio di Hustisia por hasi pa yuda enkaminá e proseso finansiero mas lihé, spesialmente den e maneho di bestelbon. A wòrdu señalá ku e proseso interno di bestelbon ta tuma hopi tempu, loke por krea retraso den e pago na empresanan i otro partnernan ku ta traha ku Gobièrnu di Kòrsou. Esaki tabata un bon momentu unda Ministerio di Hustisia a yega na afspraknan konkreto ku kada tim di maneho pa yega na un proseso mas efisiente, ku meta pa minimalisá e tempu di warda pa kompania risibí nan pago. E afspraknan aki ta mira na mas koordinashon, klaridat den proseduranan i responsabilidat mas definí entre e instansianan envolví.
Internamente, e seshon a dediká tambe atenshon na e logronan di Ministerio di Hustisia den aña 2025. A presentá un resúmen di e proyektonan ku a wòrdu kompletá ku éksito, i a inisiá riba e proyekshon di e proyektonan ku ta planifiká pa aña 2026, ku enfoke riba kontinuidat, inovashon i fortalesé e kadena hudisial. Otro punto importante tabata e presupuesto di 2026. A para ketu na e medionan finansiero disponibel ku mester wòrdu distribuí i lokual ta prioridatnan ku kada organisashon hudisial mester pone, basá riba nan mishon i responsabilidat den e kadena.
Hefe di Kabinèt di Ministerio di Hustisia, sra. Saran Inderson, a hiba un presentashon riba Maneho Hudisial pa e próksimo añanan, kaminda a suprayá e importansia di un gobernashon balansá ku bon planifikashon i monitoreo kontinu o. Huntu kuné, sra. Luz-Celeste Johannes, Hefe di Maneho, a atendé e tópiko di Planifikashon di Aña 2026, konosí komo “jaarplan”, unda a indiká kon esaki mester wòrdu prepará i entrega. Den e seshon, Ministerio di Hustisia a introdusí un formato nobo pa e planifikashon aki, ku lo yuda kada organisashon hudisial pa implementashon di nan proyektonan den e próksimo periodo.
Finalmente, sra. Tiara Hasselhoef, di parti di Fondo di Kriminalidat, a tene un presentashon tokante e proyektonan ku e fondo a finansiá durante aña 2024 i 2025, asina tambe un aktualisashon di e fondo ku tin disponibel. E seshon stratégiko a konfirmá e kompromiso di Minister Hato i e kadena hudisial pa sigui traha huntu na un sistema di hustisia mas efisiente, transparente i prepará pa e reto di futuro.
[Fin di komunikado]
