Publiká riba 09 Yanüari 2026
Willemstad, Curaçao – 9 di yanüari 2026, Awe merdia, Minister di Desaroyo Ekonómiko, Roderick Middelhof, a reuní direktamente ku operadónan di e stèntnan ku a keda afektá dor di e kandela ku a surgi ayera nochi riba Plasa Wilson “Papa” Godett.
Durante e enkuentro, Minister Middelhof a mustra solidaridat pa ku e personanan aki i a splika e proseso ku lo sigui pa evaluá e situashon i tambe medidanan di sostén di parti di Gobiernu di Kòrsou i Fundashon Marshe.
Minister Middelhof a informá e operadónan di stènt ku ya trabounan a kuminsa pa remplasá e daknan ku a kima i tambe ku nan lo risibí un sostén ekonómiko pa ku e daño ku nan a risibí a konsekuensia di e kandela ku a surgi.
E personanan a haña oportunidat pa kompartí nan eksperensha i pa indiká e retonan ku nan ta enfrentá den e momentunan aki.
Minister Middelhof ta enfatisá ku mientras tantu ku e operadónan di e stènt ta situá riba Plasa Wilson “Papa” Godett temporalmente en espera di e finalisashon di renobashon di Marshe Nobo, nan seguridat ta keda prioridat di Gobiernu di Kòrsou i di Fundashon Marshe.
