Publiká riba 26 Novèmber 2025
WILLEMSTAD – 18 di novèmber 2025 – Minister di Desaroyo Ekonómiko Roderick Middelhof a habri e International Medical Conference Curacao 2025 na nòmber di Ministerio di Salubridat, Medio Ambiente i Naturalesa (GMN).
Den su diskurso, Minister Middelhof a enfatisá e relashon esensial entre salubridat públiko i desaroyo ekonómiko. Segun Minister Middelhof, un sistema di kuido fuerte no solamente ta kontribuí na protekshon di e poblashon, pero tambe ta fortalesé stabilidat ekonómiko, ta stimulá inovashon i ta krea oportunidatnan nobo pa kresementu.
“Salubridat no ta djis un asunto mediko. E ta un di e pilarnan di un ekonomia fuerte i progresivo,” asina e minister a bisa. Ela enfatisá ku e sektor di kuido ta duna un aporte importante na ekonomia di Kòrsou pa medio di empleo, invershonnan, investigashon i desaroyo di profeshonalnan kalifiká.
E konferensia trese varios ekspertonan médiko lokal i internashonal, investigadónan, hasidónan di polítika i partnernan di kuido di salú huntu pa papia tokante inovashonnan den entrega di kuido di salú, solushonnan di salú digital, seguridat di pashènt, investigashon médiko i koperashon internashonal. Partisipantenan a eksplorá opshonnan pa sigui fortalesé e sistema di kuido di salú di Kòrsou i amplia e posishon di nos isla komo sentro di konosementu i ekspertisio regional.
Minister Middelhof a señalá tambe ku invershonnan kontinuo den e sektor di kuido ta nesesario. Inisiativanan di desaroyo ekonómiko, manera modernisashon di fasilidatnan, digitalisashon i fortifikashon di merkado laboral, ta hunga un ròl krusial den mehorashon di kalidat i aksesibilidat di kuido.
E Konferensha Médiko Internashonal Curaçao 2025 a konkluí ku un seri di presentashon, tayer i diskushonnan dirigí riba mehorá resultadonan di salú i fortalesé koperashon internashonal.
