Publiká riba 05 Novèmber 2025
WILLEMSTAD – E Kindness Rock Garden na Marie Pampoen ta un inisiativa ku ta promové bondat, kreatividat i union den nos komunidat. E proyekto ta invitá tur hende, grandi i chikí, pa pinta piedranan di laman ku mensahe positivo òf diseño alegre, i agreg’é na e jardin. Bishitantenan por skohe pa tuma un piedra ku ta papia ku nan, laga un piedra pa otro, òf simplemente disfrutá di e ekspreshon di speransa i bondat.
Minister Middelhof, huntu ku parlamentario Ishahier Monte i e team di ministerio di desaroyo ekonómiko, a bishitá e jardin pa mustra nan sosten pa e inisiativa. Durante e bishita, minister Middelhof a pone su propio piedra ku e palabra “Huntu nos ta logra”, un mensahe di union i e poder di loke nos por logra si nos traha huntu.
E Kindness Rock Garden ta un idea di artista lokal Jahina Helmijr, ku a lansá e proyekto for di 2024 ku un somo meta: pa “pinta nos isla ku bondat.” E jardin ta lokalisa na banda di laman, tras di e area di rekreo (speeltuin) na Marie Pampoen, i ta habrí pa públiko for di 28 di òktober 2025.
