Publiká riba 09 Yanüari 2026
Willemstad, Curaçao – 9 di yanüari 2026, Awe mainta, Minister di Desaroyo Ekonómiko, Roderick Middelhof, a tene un reunion ku e Raad van Commissarissen (RvC) i Marktmeester di Fundashon Marshe pa evaluá e situashon despues di e kandela ku a surgi ayera anochi na Plasa Wilson “Papa” Godett, kaminda operadónan di stènt di Marshe Nobo ta ubiká temporalmente.
Durante e reunion, a papia riba e medidanan inmediato ku mester tuma pa garantisá seguridat di e área, pa evaluá e daño i pa koordiná akseso pa inspekshon tékniko. Tambe a papia riba e impakto riba e bendedónan i e nesesidat pa wak kon e por duna nan sosten i orientashon den e fase aki.
Minister Middelhof a suprayá ku seguridat di tur persona ku ta usa e espasio ta prioridat number un, i ku tur desishon lo tuma a base di evaluashon profeshonal i koordinashon ku instansianan relevante.
Minister Middelhof lo sigui traha direktamente ku Fundashon Marshe pa koordiná e siguiente pasonan.
