Publiká riba 29 Mart 2026
Oranjestad/Willemstad – Den kuadro di un bishita ofisial na Aruba, Minister di Desaroyo Ekonómiko di Kòrsou, señor Roderick Middelhof, a logra un paso importante den e proseso pa eliminá e obligashon di visa pa siudadanonan di República Dominicana por drenta Kòrsou.
Durante e bishita, Minister Middelhof a tene un reunion konstruktivo ku Minister President di Aruba, señor Mike Eman, den presensia di Minister di Turismo, Transporte i Labor di Aruba, señor Wendrick Cicilia. Den e reunion aki, e tema di obligashon di visa pa siudadanonan di República Dominicana tabata sentral. Aruba a mustra komprondementu pa e importansia di e paso aki pa Kòrsou i a deklará su disponibilidat pa sostené Kòrsou den e trayekto aki. Den esaki a keda akordá ku Aruba lo prepará un karta formal pa sostené Kòrsou den su petishon pa eliminashon di e visa di República Dominicana na Reino Hulandes.
Ta importante pa menshoná ta ku, segun investigashon di Curaçao Tourist Board (CTB), eliminashon di e obligashon di visa pa siudadanonan di República Dominicana por resultá den un oumento di aproksimadamente 80.000 turista adishonal pa aña pa Kòrsou. Esaki lo tin un impakto positivo signifikativo riba nos ekonomia, empleo i desaroyo di sektor di turismo.
E resultado aki ta un refleho di liderasko fuerte i kompromiso di Minister Middelhof pa pone interes di Kòrsou na promé lugá i pa traha aktivamente na solushonnan ku ta fortalesé nos posishon ekonómiko den region.
Ademas, Minister Middelhof a tene un polílogo amplio ku e Ministernan di Aruba riba e kresementu di turismo den ambos paisnan. Den e kombersashonnan aki oportunidatnan pa kresementu sostenibel a keda enfatisá i tambe e nesesidat pa maneho stratégiko den e sektor di turismo.
Den kuadro di e kombersashonnan aki, Minister di Turismo, Transporte i Labor di Aruba, señor Wendrick Cicilia, a pone énfasis riba e nesesidat urgente pa mehorá konektividat aéreo entre Kòrsou i Aruba. El a ekspresá su preokupashon ku e kantidat limitá di buelonan entre ambos isla i a hasi un yamada na Kòrsou pa drenta den konsultashon ku kompanianan aéreo lokal, ku e propósito pa oumentá frekuensia di buelonan. Segun Minister Cicilia, un mehor konektividat aéreo ta esensial pa fasilitá mobilidat, stimulá turismo i fortalesé relashonnan ekonómiko entre e paisnan. Minister Middelhof ta apresiá e kontribushon balioso di Minister Cicilia i a indiká ku Kòrsou lo tuma e petishon aki serio, mirando e importansia strategiko di un konekshon aéreo mas fuerte den region.
Den mesun konteksto, Minister Presidente di Aruba, señor Mike Eman, a pone énfasis riba e importansia pa e paisnan Karibense den Reino drenta den un diálogo struktural entre nan mes, ku e propósito pa forma un posishon komun tokante e futuro di Landspakket. El a indiká ku ta esensial pa e paisnan koordiná nan punto di bista i komunika ku un solo bos den direkshon di Reino Hulandes tokante kon nan ke manehá i kontinuá ku e trayekto di Landspakket.
Tambe a diskutí e diferente posibilidatnan pa intensifiká kolaborashon regional riba otro terenonan importante, manera salubridat públiko. E idea ku a bini dilanti ta pa paisnan den region (Aruba, Sint Maarten, Kòrsou i Boneiru) kada unu spesialisá nan mes riba sierto áreanan médiko spesífiko. Minister President di Aruba, señor Mike Eman, a indiká ku aktualmente Aruba ta spesialisá i ekipá pa loke ta tratamentu di kanser na pechu. Modelonan di spesialisashon asinaki por kontribuí na un sistema di kuido di salú mas efisiente i sostenibel den region i por resultá den un redukshon signifikante di gastunan médiko i envio di pashèntnan pa tratamentu na otro paisnan ekstranhero kaminda tratamentu médiko ta muchu mas kostoso.
E reunion a suprayá e balor di mas koordinashon i kolaborashon entre Kòrsou i Aruba, kaminda e partidonan ta di akuerdo ku kontakto mas struktural lo kontribuí na desaroyo ekonómiko duradero pa e region.
Ku e logro aki, Minister Middelhof ta mustra un biaha mas su dedikashon pa trese resultado konkreto pa pueblo di Kòrsou, habriendo porta pa mas oportunidadnan ekonómiko i fortalesiendo nos relashonnan internashonal.
