Publiká riba 27 Òktober 2025
WILLEMSTAD — Manera a indiká siman pasá, Minister Middelhof ta sostene e ministerio di GMN bou di mandato di Prome Minister Pisas. I pa e motibu ei a pone fecha pa reuní ku direktiva di Asosiashon di Enfermeranan Kòrsou (CBV) pa papia tokante nan preokupashonnan tokante e situashon na Fundashon PSI Skuchami.
Minister Middelhof ta enfatisá ku e preokupashonnan di trahadónan di kuido médiko ta wòrdu tumá na serio i ku e personalmente ta deseá di hiba un diálogo pa aklará e problemanan aktual denter di e organisashon.
Meta di e reunion ta pa evaluá e situashon den seno di PSI Skuchami i determiná ki pasonan konkreto por tuma pa mehorá servisio i kondishonnan di trabou.
Minister Middelhof ta bisa ku e ta spera un kolaborashon konstruktivo ku tur partido envolvi, ku e meta komparti di fortifika kuido di salu riba e nos isla.
