Ministerio di ESKD ta duna posibilidat pa posponé Pruebanan di mañan

WILLEMSTAD – Kòrsou ta pasando den un situashon delikado pa ku suministro di koriente dor di fayonan tékniko. Manera ta premirá ta te ku 22:00 tur kas ta bai haña koriente bèk komo ke esaki ta bai segun fase. Perspektiva ta ku mañan tur kas tin koriente bèk di forma optimal. Teniendo kuenta ku esaki no tin motibu pa sera skolnan mañan.

Pero komo ku e situashon di suministro di koriente ta di influensia riba preparashon di nos studiantenan nos ta krea un posibilidat di espasio pa nos hóbennan. Komo minister di Enseñansa, Siensia, Kultura i Deporte (ESKD) mi ta sigui traha huntu ku mi ministerio i tur direktiva di Skol pa por tin un enseñansa ku ta duna perspektiva, oportunidat igual i ekitativo.

Konsiderando e situashon aktual di koriente komo titular enkargá ku enseñansa mi ta duna oportunidat na Direktivanan di Skol pa posponé (schuif) fecha i/o orario di pruebanan mañan. Esaki ta pa duna tur hóben e oportunidat pa prepará bon i trankil pa pasa nan pruebanan. Pa ku èksamen nan di CXC, Ministerio di ESKD ta konseha tur Direktiva di Skol pa tuma kontakto ku Sentro di Ekspertisia di Prueba i Èksamen (ETE) ku ta e outoridat responsabel pa e aktividat aki.

Un petishon na tur mayor, alumno, studiante, maestro, dosente i trahadó no-dosente pa keda den kontakto estrecho ku nan skol i/òf Direktiva di Skol pa nan haña e informashon verídiko ku ta aplikabel pa e skol di nan. Komuniká direktamente ku otro i asina por keda bon informá.

Den e link athunto por tuma nota di e karta pa Direktiva di Skolnan: Brief ivm stroomuitval

—
Sithree van Heydoorn
Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte