Publiká riba 08 Òktober 2025
Willemstad, 7 di òktober 2025 – Den kuadro di e selebrashon di 15 aña di Kòrsou komo pais outónomo den Reino Hulandes, Parlamento di Kòrsou a organisá e evento ‘Galeria di Pais Kòrsou’, pa honra e Presidentenan ku a sirbi for di 10 di òktober di 2010 te ku awor.
E seremonia a tuma lugá na Marriott Beach Resort, kaminda Presidente di Parlamento, sr. Fergino Brownbill, a entregá e premio ‘Martin di Oro’ na kada eks Presidente.
E premio ‘Martin di Oro’ ta un rekonosimentu pa persona òf organisashon ku a fortalesé prinsipionan manera demokrasia, diálogo i transparensia. Esaki tabata e promé biaha ku Parlamento di Kòrsou a otorgá e premio aki.
Nos Promé Minister sr. Gilmar Pisas tambe tabata entre e honoradonan. Promé Minister Pisas a sirbi komo Presidente di Parlamento di 17 di febrüari te ku 23 di mart 2017.
sr. Brownbill a rindi un homenahe spesial na sr. Pisas:
“Sr. Pisas, den bo periodo bo a mustra e balor di un kurason pa e pueblo i pa e asuntunan sosial. Bo a dirigí e reunionnan ku vishon kla i intenshon sinsero: ku kada desishon tabata pa e benefisio direkto di nos komunidat. Bo a krea un ambiente di kolaborashon i rèspèt entre e Miembronan di Parlamento.”
Sr. Pisas a risibí su premio ‘Martin di Oro’ komo símbolo di rekonesimentu pa su liderazgo i su aportashon na e desaroyo di nos demokrasia.
