Publiká riba 05 Desèmber 2025
WILLEMSTAD – Djabièrnè, 5 di desèmber 2025, Promé Minister Gilmar Pisas a tuma e desishon pa kanselá su bishita di trabou pa Hulanda, ku tabata programá pa e fin di siman akí. E bishita tabata inkluí partisipashon den Inter Expo-Koninkrijk dia 9 di desèmber i tambe asistí na reunionnan importante ku vários mandatario den Reino.
Promé Minister Pisas a indiká ku, mirando desaroyonan regional, i su responsabilidat pa dirigí e preparashon i evaluashon di senarionan aktual huntu ku outoridatnan relevante den Reino i instansianan lokal, el a konsiderá ku su presensia na Kòrsou ta mas nesesario na e momentonan akí. Pa garantisá kontinuidat di e programa internashonal, Minister di VVRP, sr. Charles Cooper, lo representá Kòrsou durante e evento Inter Expo-Koninkrijk na Hulanda i lo tene e reunionnan ku tabata programá.
Promé Minister Pisas ta enfatisá ku, ounke e agènda na Hulanda ta importante, e situashon aktual tin prioridat pa protehá stabilidat di nos pais, keda alerta, sigui koordiná i prepará den kaso ku tin desaroyo den nos region. E desishon di Promé Minister pa keda Kòrsou ta reafirmá e kompromiso pa sirbi i protehá nos komunidat. No tin motibu pa preokupashon aktualmente i pueblo di Kòrsou por keda trankil.
Huntu ku partnernan den Reino, Gobièrnu di Kòrsou lo sigui monitoriá e situashon i si tin desaroyo lo informá komunidat.
