Publiká riba 26 Òktober 2025
Willemstad – Resientemente, a surgi un diskushon públiko tokante e desishon di Presidente di Parlamento, Sr. Fergino Brownbill (MFK), pa posponé un reunion públiko di Parlamento pidí pa e partidonan di oposishon PAR, PNP, i MAN/PIN. E partidonan aki, huntu ku diferente eksperto, komentarista, èks polítiko, y èks mandatario a kritiká e hóben Presidente di Parlamento di un manera feros.
Despues di esaki a hasi un investigashon pa sa si e posponementu di reunionnan dor di e Presidente di Parlamento “te próksimo aviso” no a sosodé ántes òf por wòrdu konsiderá “anti-demokrátiko”. Esaki no ta e kaso. Posponementu di reunionnan dor di òf na nòmber di Presidente di Parlamento ta algu usual den e práktika parlamentario di Kòrsou pa añanan kaba i pues no ta algu nobo. Un inventarisashon di e periodo 2017–2020, esta durante e periodo di gobernashon promé ku e gobièrnunan di MFK di e último kuater añanan, ta mustra ku por lo ménos 34 reunion a keda posponé “te próksimo aviso” dor di òf na nòmber di e presidentenan di e tempu ei.
Den ningun di e 34 kasonan aki un desishon asina di e presidentenan di Parlamento di e tempu ei a keda kompañá pa un polémika públiko, manera tabata e kaso resientemente despues di e desishon di e aktual presidente pa posponé e reunion di Parlamento yamá despues di e konflikto entre e èks Minister di Finansa i Ontvanger. Ku otro palabra, pa añanan kaba presidentenan di Parlamento ta posponé, òf hasta kanselá, reunionnan pidí pa miembronan sin ningun problema basta tin un bon motibu. Nunka ántes un desishon
asina di e presidentenan di Parlamento di e tempu ei a wòrdu yamá “anti-demokrátiko”
òf a kontra reklamo di oposishon. No tin motibu pa esaki awor tampoko, pasobra Gobièrnu a primintí presidente di
Parlamento, ku e lo bini Staten, kompañá pa Ontvanger, pa asina e miembronan, inkluso e partidonan di oposishon ku a pidi e reunion, por haña oportunidat pa hasi Gobièrnu i Ontvanger e preguntanan nesesario.
Gobièrnu ta keda komprometé na transparensia i responsabilidat polítiko pa ku Parlamento, manera ta preskribí den e Areglo di Estado i konforme e práktika konstitushonal di Kòrsou. Pues, Promé Minister Gilmar Pisas ta konkluí ku e keho di oposishon riba posponementu di e reunion di Staten di dia 17 di òktober último ku Gobièrnu i Ontvanger no ta hustifiká.
Aki por tuma nota di e 34 reunionnan parlamentario ku a wordu kanselá den pasado.
