Publiká riba 03 Novèmber 2025
WILLEMSTAD – Riba djaluna, 3 di novèmber 2025, Promé Minister sr. Gilmar Pisas, Minister di Enseñansa, Siensa, Kultura i Deporte, sr. Sithree van Heydoorn i Minister di Hustisia, sr. Shalten Hato, a papia ku Presidente di Repúblika di Sürnam, Sra. Jennifer Geerlings-Simons. Sra. Geerlings-Simons tabata na Kòrsou den tránsito pa un biahe di trabou.
Promé Minister, ministernan i Presidente a papia ampliamente tokante vários desaroyo den nos region manera e orkan ku a kousa desaster na Jamaica, Haiti, Cuba i Bermuda. Ademas a papia tokante e situashon tenso entre di Venezuela i Merka, i e konsekuensianan pa nos region manera e redukshon di entrada pa e sektor di turismo. Tambe a diskutí kon por koperá mas huntu den área di hustisia, ekonomia, agrikultura i transporte pa benefisio di ambos pais.
E enkuentro akí a tuma lugá den un esfera ameno kaminda Promé Minister, Minister di Enseñansa, Siensa, Kultura i Deporte, Minister di Hustisia i Presidente di Repúblika di Sürnam a enfatisá e lasonan históriko, kultural i familiar ku tin entre Kòrsou i Sürnam.
