Publiká riba 14 Novèmber 2025
Willemstad – Representantenan di Gobièrnu, liderá pa Promé Minister Pisas, a tene un reunion habrí i konstruktivo awe ku representantenan di organisashonnan di penshonadonan i sindikatonan tokante e diskushon rondó di e indeksashon di e penshun di behes (AOV). Durante e reunion, e organisashonnan aki a para ketu riba e nesesidat pa hasi adaptashon den e montante di AOV i riba e falta di indeksashon for di 2021.
Promé Minister Pisas a enfatisá ku tin un diferensia di opinion entre Gobièrnu i e organisashonnan di penshonadonan i sindikatonan pa loke ta trata e método di indeksashon di e penshun di behes i ku riba esaki tin un kaso pendiente den korte ku Gobièrnu no por intervení aden. Tambe el a señalá ku indeksashon kompletu di forma retroaktivo lo kondusí na sumanan impagabel pa e pais, poniendo e fondo di seguridat sosial i Pais Kòrsou den difikultatnan finansiero grandi, ku tur e konsekuensianan ku lo surgi pa e stabilidat di finansa públiko. Na mes momento, Gobièrnu ta rekonosé ku hopi hende grandi e último añanan a sufri un pèrdida den nan poder di kompra, i ku e nivel aktual di e penshun di behes no ta reflehá e realidat di kosto di bida mas. Esaki ta menasá di krea un impase, ku no ta deseabel debí na e tenshonnan sosial ku esaki ta krea.
Pa evitá e impase aki, Promé Minister Pisas a palabra ku e organisashonnan di penshonadonan i sindikatonan ku nan lo entrega un proposishon pa oumento di AOV na Gobièrnu komienso di otro siman. Despues Banko di Seguro Sosial (SVB) lo hasi e kalkulashonnan nesesario. A base di e kalkulashonnan aki, Gobièrnu lo pidi algun instansia di konseho pa evaluá e proposishon su faktibilidat i posibel alternativanan. E intenshon ta pa oumentá e AOV ku un montante mutuamente aseptabel entrante 1 di yanüari 2026. E montante eksakto lo wòrdu determiná e luna aki mes. Despues, e sistema di AOV – inkluso un modelo nobo di indeksashon – lo wòrdu ahustá pa garantisá ku e ta keda relevante den futuro, transparente, faktibel i finansieramente pagabel. Pa e finansiamentu struktural di e AOV adaptá, Gobièrnu lo traha riba un pakete koherente di medida ku lo wòrdu implementá na 2026 i 2027.
Gobièrnu ta ekspresá su apresio pa e aserkamentu konstruktivo di e organisashonnan di penshonadonan i sindikatonan. A akordá ku lo sigui konsultá ku otro riba e trayekto. Promé Minister Pisas a enfatisá finalmente ku Gobièrnu ta keda komprometé na un sistema di AOV ku ta respetá e dignidat di nos grandinan i tambe ta finansieramente responsabel pa nos pais.
