Publiká riba 31 Òktober 2025
Willemstad – Awe Promé Minister Gilmar Pisas a habri ofisialmente e Asamblea General di Asosiashon Internashonal di Konsehonan Ekonómiko i Sosial i Institushonnan Similar (AICESIS) na Renaissance Wind Creek Resort. E Asamblea AICESIS ta tuma lugá di 31 di òktober pa 2 di novèmber 2025 na Kòrsou i ta reuní representantenan di mas ku sinkuenta pais pa papia tokante hustisia sosial, inklushon ekonómiko, i kresementu duradero.
Den su diskurso di apertura, titulá “E poder di diálogo den formashon di nos futuro komun”, Promé Minister Pisas a enfatisá e importansia di diálogo – i, komo ekstenshon di esei inklushon i solidaridat – komo e fundeshinan pa un desaroyo sostenibel i koperashon mundial. Promé Minister Pisas a yama bon biní na representantenan di konsehonan sosial i ekonómiko di mas ku sinkuenta pais, deklarando ku Kòrsou ta orguyoso di ta anfitrion di un organisashon ku ta pone e poder di diálogo i konsenso sentral. El a señalá ku koperashon internashonal ta bou di tenshon rònt mundu, pero ku AICESIS ta sigui demostrá ku diálogo real ta keda e kaminda mas konfiabel pa komprenshon mutuo, pas i progreso.
Segun Promé Minister Pisas, sosiedatnan ta logra balansa ora gobièrnunan, dunadónan di trabou, trahadónan i ekspertonan ta interkambiá ku otro komo igual. Inklushon i partisipashon, el a bisa, no ta djis idealnan demokrátiko pero kondishonnan esensial pa stabilidat sosial i ekonómiko. Promé Minister a enfatisá ku hustisia sosial ta inseparabel for di sostenibilidat i ku konsenso ta representá e forsa di mas grandi di un demokrasia.
Reflekshonando riba e último dos añanan, durante kual Kòrsou su Konseho Sosial-ekonómiko (SER) a okupá e presidensia di AICESIS, Promé Minister Pisas a ekspresá su apresio na tur e estadonan miembro pa nan konfiansa y kooperashon, mustrando ku hasta un isla chikitu manera Curaçao por duna un kontribushon signifikativo na e kooperashon multilateral. El a anunsiá ku Kòrsou lo sigui promové aktivamente e balornan sentral di AICESIS – diálogo, inklushon, i solidaridat – asta despues di konkluí su presidensia. Finalmente, Promé Minister Pisas a yama Gresia un kaluroso bon biní komo e presidente nobo di AICESIS i a ekspresá konfiansa ku bou di liderazgo Griego e organisashon lo sigui fortalesé su ròl mundial.
