Publiká riba 24 Novèmber 2025
WILLEMSTAD / PARAMARIBO – Riba invitashon ofisial di Gobièrnu di Repúblika di Sürnam, Promé Minister di Kòrsou, sr. Gilmar Pisas, ta na Sürnam pa partisipá na e selebrashon nashonal pa marka 50 aña di Independensia di Repúblika di Sürnam.
E delegashon di Kòrsou ta konsistí di sr. Djurick Comenentia (SG di AZ/BB), sra. Vanessa van Dijsseldonk, sra. Christa Zuiverloon.
Durante nan estadia, Promé Minister lo partisipá na un programa intensivo ku ta inkluí reunionnan informativo, enkuentro ku sektor privá, un bishita di kortesia na e Presidente di Repúblika di Sürnam, H.E. Jennifer Geerlings-Simons, presentashonnan ofisial i eventonan kultural.
Dia 25 di novèmber, di 50 aña di Independensia di Suriname, of Srifidensi Dey Promé Minister ta partisipá na e ‘Buitengewone Openbare Vergadering’ di ‘De Nationale Assemblée’, e parada i desfile, i e resepshon ofisial na Palasio Presidensial, den kuadro di selebrashon di e 50 aña di Independensia.
E bishita ta sirbi pa fortalesé relashon históriko, kultural i diplomátiko entre Kòrsou i Sürnam. Promé Minister Pisas a ekspresá su profundo apresio pa e invitashon ofisial i pa e manera kaluroso i respetuoso na momento di su yegada.
