Publiká riba 27 Novèmber 2025
WILLEMSTAD – djaweps, 27 di novèmber 2025, Promé Minister sr. Gilmar Pisas, a risibí Embahador di Suesia na Hulanda, sr. Julius Liljeström. Esaki tabata un bishita di kortesia kaminda Embahador Liljeström a bini pa introdusí su mes komo embahador nobo di Suesia, pa sera konosí ku Kòrsou i pa eksplorá área di interés komun.
Promé Minister Pisas i Embahador Liljeström a interkambiá riba temanan manera sostenibilidat, energia renovabel, i e transishon bèrdè di e sektor di energia. Tambe a papia tokante e importansia di diversifikashon ekonómiko pa paisnan i kon inovashon, en partikular den sektor digital por yuda pa ku esaki. Promé Minister i e Embahador a reafirmá nan deseo pa intensifiká kolaborashon entre Kòrsou i Suesia, partikularmente na área di teknologia bèrdè, desaroyo di kapasidat i inovashon ekonómiko orientá na futuro.
E bishita a tuma lugá den un esfera ameno basá riba bon entendimentu i kolaborashon, pa sigui mantené un diálogo kontinuo na benefisio di Kòrsou.
