Publiká riba 10 Mart 2026
WILLEMSTAD – djamars 10 di mart 2026, Promé Minister di Kòrsou, sr. Gilmar Pisas, a risibí e komishon ku lo ta enkargá ku organisashon di e 79 edishon di Gulf and Caribbean Fisheries Institute (GCFI) Conference, ku lo tuma lugá na Kòrsou den luna di novèmber 2026.
E komishon ta konsistí di varios profeshonalnan di Fundashon Ekonomia Sosial Kòrsou, Federashon Kooperativanan Uní di Produkshon (FKUP), Piskabon di Boneiru i varios miembro di e instituto GCFI.
Durante e enkuentro, e delegashon a informá Promé Minister Pisas tokante e preparashonnan pa e konferensia, ku lo reuní ekspertonan, sientífikonan, profeshonalnan di rekursonan marino, representante di sektor privá i otro profeshonalnan relevante for di henter region di Karibe i Golfo di México. E konferensia lo dura seis dia i lo sirbi komo un plataforma importante pa interkambio di konosementu, eksperensia i perspektivanan tokante uso i maneho sostenibel di rekursonan marino.
Durante e enkuentro tambe a papia tokante diferente tópiko ku lo por wordu tratá durante e konferensia, manera asuntonan sosio-ekonómiko relashoná ku sektor di peska, e efektonan di klima riba nos region, i e ròl di Marine Protected Areas (MPA) den protekshon i maneho sostenibel di biodiversidat marino. Tambe a enfatisá e importansia di inovashon i partisipashon di diferente sektor, inkluyendo e mundo korporativo.
E organisashon GCFI ta enfoká riba konektá profeshonalnan ku ta aktivo den e sektor di peska i áreanan marino pa stimulá kolaborashon den region. Den e kuadro aki, e institushon tin diferente inisiativa pa fortalesé kapasidat i maneho di áreanan marino protehá. Ademas, GCFI tin un programa akadémiko ku ta stimulá partisipashon di hóben i studiante den e sektor di peska i siensia marino, ku e meta pa prepará un generashon nobo di profeshonalnan i usuarionan responsabel di rekursonan marino.
Promé Minister Pisas a ekspresá su apresio pa e bishita i a deseá tur éksito ku e preparashonnan pa e konferensia. El a enfatisá ku inisiativanan manera e GCFI Conference ta kontribuí na fortalesé kolaborashon regional pa protekshon i uso sostenibel di rekursonan marino den nos region.
Riba portrèt ( di man robes pa man drechi):
sr. Lutson Lucas (FKVP), sra. Nancy Persad (Piskabon Boneiru), sra. Fadilah Ali (GCFI), sr. Franklin Sluis (koordinadó di e evento), Promé Minister Gilmar Pisas, sr. Alejandro Acosta (GCFI), sr. Ernest de Lanoy (Piskabon Boneiru) i sr. Jerson Honigen (Fundashon Ekonomia Sosial Kòrsou – FESK).
