Publiká riba 08 Mart 2026
WILLEMSTAD – djadumingu 8 di mart 2026, Promé Minister Gilmar Pisas, komo minister enkargá ku e kadena energétiko di Kòrsou, ta sigui di serka e desaroyonan resiente den e merkado internashonal di petroleo.
Debí na tenshonnan den Medio Oriente, preis di petroleo a mustra un subida drástiko den e último dianan. Promé Minister Pisas ta den kontakto estrecho ku Regulatory Authority of Curaçao (RAC) pa evaluá si e situashon aki por tin implikashon pa e tarifanan lokal di gasolin i diesel den e lunanan venidero.
Promé Minister Pisas ta indiká ku ta importante pa komunidat sa ku na Kòrsou e tarifanan di kombustibel no ta kambia inmediatamente ku e moveshonnan den merkado mundial. E tarifanan lokal ta wòrdu determiná mensualmente, basá entre otro riba e preisnan promedio di kompra den e periodo anterior.
Na e momento aki ainda no tin indikashon kla tokante un kambio inmediato den e tarifanan lokal. No opstante esaki, Promé Minister Pisas lo sigui monitoriá e desaroyonan den merkado energétiko i lo informá komunidat debidamente si tin algun implikashon pa e tarifanan di energia, inkluyendo esunnan di koriente i awa.
