Publiká riba 08 Desèmber 2025
Willemstad – djaluna 8 di desèmber 2025. Despues di a tuma e desishon pa keda Kòrsou, Promé Minister Pisas awe tabata tin un reunion virtual ku señor van Weel minister di relashonnan eksterior, Promé Minister di St. Maarten señor Mercelina i Promé Minister di Aruba señor Eman tokante e desaroyo geopolítiko resiente den Karibe, inkluyendo e tenshonnan ku por surgi den relashon ku Venezuela.
Sigun e informashon ofisial ku nos tin di Reino Hulandes, no tin indikashon aktual di un menasa agudo pa Aruba, Boneiru òf Kòrsou.
Reino Hulandes ta sigui monitoriá e desaroyonan den nos region ku hopi diligensia, i ta tene reunionnan struktural i regular entre e Gobièrnunan di Hulanda, Aruba, Kòrsou, Sint Maarten i Boneiru pa interkambiá informashon tokante seguridat, maneho di krísis i preparashon pa situashonnan posibel ku por surgi den region.
Den kuadro di esaki Aruba, Boneiru i Kòrsou ta trahando riba varios senario pa dil ku kualke efekto ku por surgi den futuro, ku sosten di departamentonan relevante di Hulanda.
Gobièrnu di Kòrsou ta pone énfasis riba mantené trankilidat, vigilansia i preparashon. Den kuadro di relashonnan den Reino, nos ta sigui traha man na man ku Hulanda, Aruba, Sint Maarten i Boneiru pa protehá stabilidat i seguridat regional, semper den rèspèt pa e normanan internashonal ku ta guia nos komunidat.
