Artikulo 43 den Statut ta unu ku ta trata alto supervishon den kaso ku Kòrsou mes no por yuda su mes den un situashon kaminda derechinan humano fundamental, siguridat hurídiko i bon gobernashon ta na peliger. Esaki no ta e kaso aktualmente. Ta Kòrsou ta pidi Hulanda pa yudansa i asistensia riba sierto aspekto den e krisis di migrashon, pa motibu di e konsekuensianan ku esaki por trese kune. Aña pasá Hulanda a reakshoná positivo riba e petishon anterior di nos. Nan a kontribuí ku un montante di 132.000 Euro pa mehorashon di e sentro di detenshon pa estranheronan den espara di ekspulshon. Ademas, a duno sosten atministrativo for di diferente ministerio di Hulanda (BZK, J&V) pa yuda Kòrsou ku implementashon di e prosedimentu pa posibilidat pa estranheronan por pidi protekshon bou di art. 3 EVRM.
