Mirando ku e trabou di ministerionan ta konsistí pa 80% di ‘trabou humano’, ta opvio ku e akshon i komportashon di kada ámtenar individualmente tin influensia direkto riba resultadonan ku Gobièrnu ta logra. P’esei e ta di sumo importansia pa sostené  formashon di ámtenarnan di forma struktural.

E Governement Academy i SOAB Learning Lab a pone mannan huntu pa krea un kolaborashon fuerte, dirigí riba desaroyo esensial i profeshonalisashon di e aparato gubernamental.

SOAB learning Lab ta trese eksperensia di añanan largu i konosementu profundo di e sektor gubernamental kuné, ku ta hasi e tim kapas di por kompartí puntonan di bista balioso i duradero ku e aparato gubernamental. E meta komun di ámbos entidat ta tambe pa reforsá e aparato gubernamental pa medio di training i estudio i asina optimalisá e servisio i ehekushon di maneho gubernamental.

Ku e kolaborashon akí ta kombiná konosementu, eksperensia i ekspertisio ku ta resultá den un punto di kordinashon sentral for di unda ta implementá e Programa Gubernamental Amplio di 2024-2026. Ku esaki lo sigui aspirá p’e meta komun pa ku ámtenarnan di tur ministerio i servisio. No solamente riba nivel di konosementu si no tambe riba aspektonan personal ku ta brinda espasio pa sigui desaroyá su mes.
I asina sirbi e siudadano mihó.