Desishonnan di djárason 5 di ougùstùs 2026
Publiká riba 07 Ougùstùs 2026
Desishonnan relashoná spesífikamente ku asuntunan di pais riba nivel nashonal di djárason, 5 di ougùstùs 2026:
- Establesimentu di profil pa miembronan di hunta di komisario di Fundashon pa Stimulá Edukashon i Formashon den Bario (SEFBA) (Ministerio di Enseñansa, Siensia, Kultura i Deporte)Konseho di Minister a tuma e desishon ‘op stuk’ pa entregá e konsepto di profil pa e miembronan di Hunta di Komisario di Fundashon pa Stimulá Edukashon i Formashon den Bario (SEFBA) na konsehero ‘corporate governance’ di Fundashon pa Supervishon i Standarisashon di Entidatnan di Gobièrnu (SBTNO) pa konseho. Konseho di Minister ta bai di akuerdo ku ratifikashon final di e profil pa miembronan di Hunta di Komisario di SEFBA, konforme e konseho di SBTNO.
- Areglo di likidashon Woningbouw Curaçao N.V (Ministerio di Tráfiko, Transporte i Planifikashon Urbano)Konseho di Minister a bai di akuerdo pa sigui ku i finalisá e likidashon di Woningbouw Curaçao N.V. Ku esaki ta kontinuá ku e proseso di likidashon. Konseho di Minister a aprobá tambe e plan pa e likidashon den fase, huntu ku e ‘Terms of Reference’ ku ta kompañá esaki.
Ta pidi Minister di Tráfiko, Transporte i Planifikashon Urbano (VVRP) pa prepará e pasonan nesesario, inkluyendo e resolushonnan di akshonista i di disolushon nesesario, i pa e kumpli ku lei i regulashonnan aplikabel pa hasi esaki. Lo entregá e resolushon final di disolushon i e areglo di e portofolio di bibienda na Konseho di Minister pa aproshon mas despues.
- Ekstenshon di e periodo di inskripshon di e proyekto Rib’é Lugá (Ministerio di Hustisia)Konseho di Minister a prolongá e periodo di inskripshon pa e proyekto ‘Rib’e Lugá’ ku tres luna. E fecha final nobo ta 31 di òktober 2026. Konseho di Minister a tuma nota di e motibunan pa e prolongashon. Minister di Hustisia ta bai atendé ku e puntonan di atenshon akí ku e partidonan enbolbí i lo informá Konseho di Minister si e tres lunanan adishonal resultá insufisiente pa kompletá e proyekto.
