Publiká riba 13 Mart 2026
Desishonnan relashoná spesífikamente ku asuntunan di pais riba nivel nashonal di djárason, 11 di mart 2026:
1. Petishon por eskrito di frakshon di MAN-PIN na Presidente di Kontrolaria General di Kòrsou pa investigashon na SOAB (Ministerio di Asuntunan General)
Konseho di Minister, via di Minister di Asuntunan General, a tuma nota di un karta fechá 12 di febrüari 2026, presentá pa Presidente di Staten na Presidende di Kontrolaria General di Kòrsou (ARC) ku e petishon di frakshon di MAN-PIN na ARC pa hasi un investigashon na SOAB.
2. Karta ku reakshon di Staten riba e konseho di ‘Raad van State’ na okashon di 70 aña di eksistensia Statüt (Ministerio di Asuntunan General)
Konseho di Minister, via di Minister di Asuntunan General, a tuma nota di e reakshon presentá na Staten fechá 26 di febrüari 2026 riba konseho di ‘Raad van State’ di Reino Hulandes, na okashon di 70 aña di eksistensia di Statüt.
3. Stipulashon di funshonnan sivíl balorá na CZMCARIB (Ministerio di Hustisia)
Konseho di Minister a bai di akuerdo ku stipulashon di e deskripshonnan di trabou i evaluashonnan di trabou pa e 38 funshonnan di personal sivil, manera ta menshoná den e “Rapport FunctieWaardering HR CARPERS, Ministerie van Defensie CZMCARIB”. E desishon aki ta tumá a base di konseho di Direktor Interino di ‘Human Resources Organisatie (HRO)’ i e proposishon di Minister di Hustisia.
4. Pago di un lùmpsùm di 3% den 2026 na tur empleado i skolnan spesial ku a alkansá e máksimo di nan eskala di salario (Ministerio di Gobernashon, Planifikashon i Servisio Públiko)
Konseho di Minister a bai di akuerdo ku e pago den un solo biaha di un lùmpsùm di 3% den 2026 na tur empleado i skolnan spesial ku a alkansá e máksimo di nan eskala di salario. Ta implementá e kambio di presupuesto nesesario di Ministerio di Gobernashon, Planifikashon i Servisio Públiko a base di artíkulo 47, insiso 3, di e Ordenansa Nashonal di Kontabilidat 2010.
5. ‘Instroomplanning 2025-2026’ ahustá pa tur ministerio (Ministerio di Gobernashon, Planifikashon i Servisio Públiko)
Konseho di Minister a bai di akuerdo ku e plan di atmishon ahustá (‘instroomplanning’) pa 2025-2026. Esaki ta enserá ekspanshon di e kantidat di vakaturanan habrí den tur ministerio di 312 pa aproksimadamente 500. A tuma e desishon aki a base di e konseho di e Sekretario General Interino di Ministerio di Gobernashon, Planifikashon i Servisio Públiko, konseho di e Direktor di Sektor pa Maneho Finansiero i Presupuesto, i e proposishon di Minister di Gobernashon, Planifikashon i Servisio Públiko.
