Publiká riba 14 Yüli 2023
Desishonnan relashoná spesífikamente ku asuntunan di pais riba nivel nashonal di djárason, 12 di yüli 2023:
1. Konseho tokante petishon pa kambio den presupuesto di Ministerio di Salú, Medio Ambiente i Naturalesa pa e proyekto “Plan di Desaroyo Klein Curaçao” (Minister di Salú, Medio Ambiente i Naturalesa)
E petishon pa kambio den e presupuesto ta keda aprobá, manera proponé den e konseho di Direktor di Sektor di Maneho Finansiero i Maneho di Presupuesto di dia 22 di yüni 2023. Esaki konforme artíkulo 47, insiso tres, di Lei di Kontabilidat 2010.
2. Konseho riba dekreto nashonal den konsepto tokante Komishon di Mayornan den Enseñansa di Fundeshi (Minister di Enseñansa, Siensia, Kultura i Deporte)
Konseho di Minister ta akordá pa presentá e dekreto nashonal den konsepto, ku ta kontené reglanan importante pa komishonnan di mayornan den enseñansa di fundeshi. E dekreto nashonal akí ta kuadra ku artíkulo 17, insiso dos, di Lei di Enseñansa di Fundeshi. Pa esaki, a sigui konseho di Direktor di Direktorado di Lei i Kasonan Hurídiko di dia 16 di mei 2023 i petishon di Minister di Enseñansa, Siensia, Kultura i Deporte di dia 27 di yüni 2023. E dekreto nashonal lo ser presentá awor na Gobernador pa firma.
3. Konseho tokante Dekreto Nashonal den konsepto: Kambio dekreto nashonal pa Skolnan V.W.O., H.A.V.O. i V.S.B.O. (Minister di Enseñansa, Siensia, Kultura i Deporte)
Konseho di Minister a akordá e proposishon pa kambia e dekreto nashonal pa skolnan V.W.O., H.A.V.O. i V.S.B.O. E proposishon aki lo ser ofresé na Hunta di Konseho pa risibí konseho riba dje, promé ku e keda presentá na Gobernador pa aprobashon.
Esaki ta konforme petishon di Minister di Enseñansa, Siensia, Kultura i Deporte di dia 7 di yüli 2023, konseho di Direktor di Direktorado di Lei i Kasonan Hurídiko di dia 2 di ougùstùs 2021, i konseho di Direktor di Sektor di Maneho Finansiero i Maneho di Presupuesto di dia 29 di mart 2019.
4. Petishon den kuadro di Areglo Mutuo relashoná ku ‘Programa pa stimulá estudio den paisnan Karibense di Reino i den region’ (Minister di Enseñansa, Siensia, Kultura i Deporte)
Konseho di Minister ta akordá e siguiente puntonan:
a. Kontenido di e Areglo Mutuo den konsepto titulá “Programa pa stimulá estudio den paisnan Karibense di Reino i den region,” ku a prepará dia 30 di yüni 2023 entre Kòrsou, Aruba, Sint Maarten i Hulanda.
b. Duna minister di Enseñansa, Siensia, Kultura i Deporte e outorisashon pa firma e Areglo Mutuo na nòmber di Kòrsou.
Pa e desishon akí a tuma na kuenta petishon di Minister di Enseñansa, Siensia, Kultura i Deporte di dia 7 di yüli 2023. Ademas, Konseho di Minister ta akordá pa presentá e dekreto nashonal den konsepto inkluí den e dokumento na Gobernador pa firma.
5. Proposishon tokante e dokumentu titulá ‘Plan di desaroyo stratégiko pa destinashon turístiko 2022-2026’ (Minister di Desaroyo Ekonómiko)
Konseho di Minister ta akordá kontenido di e dokumentu titulá ‘Plan di desaroyo stratégiko pa destinashon turístiko 2022-2026’ (STDPP). E desishon akí ta basá riba proposishon di Minister di Desaroyo Ekonómiko di dia 7 di yüli 2023.
6. Petishon pa asistensia hurídiko gratuito na personanan di ménos rekurso (Minister di Hustisia)
Konseho di Minister ta akordá pa outorisá Abogado-General di Kòrsou, Sint Maarten, Boneiru, Sint Eustatius i Saba pa firmá un akuerdo na nòmber di Kòrsou ku sra. Renata M. Nieuw, abogado na Kòrsou. E akuerdo akí ta enserá dunamentu di asistensia hurídiko gratuito den kasonan sivíl na personanan ku tin poko òf ningun kapasidat finansiero.
Esaki ta basá riba petishon di Minister di Hustisia. Konseho di Minister ta bai di akuerdo pa presentá e dekreto nashonal den konsepto na Gobernador pa firma.
7. Proposishon tokante e Plan di Akshon titulá “Bario – Vernieuwing Gebiedsgebonden Politiezorg op Curaçao” (Minister di Hustisia)
Konseho di Minister ta akordá e siguiente puntonan:
a. Kontenido di e Plan di Akshon den konsepto “Bario – Vernieuwing Gebiedsgebonden Politiezorg op Curaçao”.
b. Minister di Hustisia ta risibí instrukshon pa traha protokòlnan di kolaborashon ku Minister di Desaroyo Sosial, Labor i Bienestar, Minister di Tráfiko, Trasporte i Planifikashon Urbano, Minister di Desaroyo Ekonómiko i Minister di Enseñansa, Siensia, Kultura i Deporte. Pa esaki, ta presentá protokòlnan den konsepto na e ministerionan konserní.
c. Ta pidi Minister di Hustisia pa buska sosten eksterno pa realisá e Plan di Akshon. E gastunan mester keda kubrí ‘budgetneutraal’ den Ministerio di Hustisia.
8. Petishon pa subi e norma di ònderstant i ‘AOV-toelage’ (Minister di Desaroyo Sosial, Labor i Bienestar)
Konseho di Minister ta akordá e siguiente puntonan:
a. Ta subi e normanan di ònderstant pa personanan soltero ku 30% (di NAf. 162,40 pa NAf. 211,12) i pa personanan kasá/ku partner (di NAf. 281,10 pa NAf. 365,43) for di yüli 2023.
b. Ta subi e máksimo pa kontròl di entrada (maximumtoets) ku 30% (di NAf. 320,47 pa NAf. 416,61) for di yüli 2023.
c. Personanan ku tin derecho riba ònderstant ku ta partisipá na programanan di estudio, eksperensia di trabou i ‘openbare nut-werkzaamheden’, lo risibí un kompensashon te ku NAf. 40,00.
d. Ta subi ‘AOV-Toelage’ ku 30%.
e. Lo inisiá un proseso legal pa trese kambio na e ‘Landsbesluit verhoging algemene bijstand’ i e ‘Eilandsbesluit toekenning toelage aan ouderdomspensioengerechtigden’.
E desishonnan akí a ser tumá basá riba petishon di Minister di Desaroyo Sosial, Labor i Bienestar dia 8 di yüli 2023.
9. Presentashon di e dokumentu titulá ‘Vibrando: Plan di Eventonan 2023’ (Minister di Hustisia)
Minister di Hustisia ofisialmente a presentá e dokumentu ‘Vibrando: Plan di Eventonan 2023 Minister di Hustisia’ pa keda tratá.
10. Petishon tokante Plan di Akshon pa Digitalisashon den Enseñansa di Kòrsou (Minister di Enseñansa, Siensia, Kultura i Deporte)
Konseho ta akordá e siguiente puntonan:
a. A ratifiká e Plan di Akshon pa Digitalisashon den Enseñansa di Kòrsou.
b. Lo inkluí e plan di akshon akí den e agènda di ehekushon di e Pakete Pais Kòrsou, bou di tema G Enseñansa di UA-Q4 2023. Esaki ta hasi posibel pa sigui kordiná e trayekto pa haña e fondonan nesesario for di ‘Nationaal Groiefonds’ manera indiká pa Sekretario di Estado di Asuntunan Interno i Relashonnan den Reino.
E Desishon akí a ser tumá basá riba petishon di Minister di Enseñansa, Siensia, Kultura i Deporte riba 10 di yüli 2023.
11. Petishon tokante e konsepto di lei pa Presupuesto di Kòrsou pa aña 2024 (Minister di Finansa)
Konseho di Minister a akordá e siguiente puntonan:
a. Di akuerdo ku kontenido di e konsepto di lei pa e presupuesto di Kòrsou pa aña 2024. E konsepto akí lo ser entregá na Gobernador i despues na Hunta di Konseho. Ta pidi Hunta di Konseho pa duna su konseho mas tardá riba 16 di ougùstùs 2023.
b. Di akuerdo pa duna un kopia di e ‘ontwerp’ (menshoná den artíkulo 1) na College financieel toezicht (Cft) pa konseho.
E desishon akí ta basá riba konseho di Direktor di Sektor Maneho Finansiero i Maneho di Presupuesto riba 22 di yüni 2023 i petishon di Minister di Finansa interino riba 10 di yüli 2023.
12. Presentashon karta den konsepto “Expression of interest for the leadership of the Post-2020 Caribbean Regional Indicative Programme (RIP) funded by the European Union” (Minister di Asuntu General)
Konseho di Minister ofisialmente a tuma nota di e karta den konsepto tokante “Expression of interest for the leadership of the Post-2020 Caribbean Regional Indicative Programme (RIP) funded by the European Union” despues di a risibí esaki di Minister di Asuntu General, kual a keda dirigí na e delegashon di Union Oropeo riba 27 di yüni 2023.
