Publiká riba 16 Yanüari 2026
Desishonnan relashoná spesífikamente ku asuntunan di pais riba nivel nashonal di djárason, 14 di yanüari 2026:
1. Rekonosementu di konklushonnan di e Konsulta di Kuater Pais riba Salú Públiko (Ministerio di Salubridat Públiko, Medio Ambiente i Naturalesa)
Konseho di Minister a tuma nota di e konklushonnan di e di seis Konsulta di Kuater Pais riba Salubridat Públiko. Durante di e konsulta akí, Kòrsou, Aruba, Sint Maarten i Hulanda a yega na palabrashonnan tokante koperashon riba tereno di salubridat públiko denter di Reino.
2. Ekstenshon di Tratado i Akuerdonan di Asistensia Hurídiko Mutuo ku Merka (Ministerio di Hustisia)
Konseho di Minister a aprobá inisio di e prosedura pa aplikashon di e Akuerdo pa Asistensia Hurídiko Mutuo den Asuntunan Penal entre Union Oropeo i Merka, i e Tratado entre Reino Hulandes i Merka na Kòrsou.
Esaki lo fortalesé aun mas e koperashon internashonal den investigashonnan kriminal. Minister di Hustisia ta keda asigná komo e outoridat kompetente pa ehekushon di e akuerdonan akí.
Mas informashon:
• Akuerdo entre Union Oropeo i Merka riba asistensia hurídiko mutuo den asuntunan penal
• Tratado entre Reino Hulandes i Merka riba asistensia hurídiko mutuo den asuntunan penal
3. Traspaso di animalnan for di Curaçao Zoo i investigashon riba uso di e lokalidat den futuro (Ministerio di Salubridat Públiko, Medio Ambiente i Naturalesa)
Konseho di Minister a aprobá traspaso di e animalnan for di Curaçao Zoo pa organisashonnan eksterno ku ta kumpli ku eksigensianan di bienestar pa bestia. Ademas, ta bai kondusí un investigashon pa determiná kon den futuro i di forma responsabel por bai hasi uso di e sitio kaminda tabatin e parke di bestia, pa naturalesa, rekreashon i turismo.
