Desishonnan di djárason 15 di febrüari 2023

Desishonnan relashoná spesífikamente ku asuntunan di pais riba nivel nashonal di djárason, 15 di febrüari 2023:

1. Kosneho di Minister ta bai di akuerdo pa outorisá Minister di Desaroyo Ekonómiko pa – na nòmber di Kòrsou komo persona hurídiko públiko – firma e akuerdo di ehekushon ku e kompania JEMAR Building & Constructions Management N.V. relashoná ku ehekushon di e proyekto “Trabounan di mantenshon Plaza Rondó Fase 1”.

Esaki konforme petishon di Minister di Desaroyo Ekonómiko di dia 8 di febrüari 2023 i di akuerdo ku e Raportahe Destako Públiko di 4 di yanüari 2023 prepará pa Internal Audit Department di Ministerio di Finansa.

Konseho di Minister alabes ta bai di akuerdo pa entregá e konsepto di lei na Gobernador pa firma.

Ministerio(nan) responsabel: Ministerio di Finansa.

2. Konseho di Minister ta bai di akuerdo ku kontenido di e proyekto di lei “methodiek bepaling luchtvaartveiligheidsheffing” i pa entregá esaki pa medio di Gobernador na Konseho di Konsulta pa haña konseho.

Esaki konforme petishon di Minister di Tráfiko, Transporte i Planifikashon Urbano di dia 10 di febrüari 2023 i konseho di Direktor di Direktorado di Lei i Kasonan Hurídiko.

Ministerio(nan) responsabel: Ministerio di Tráfiko, Transporte i Planifikashon Urbano.

3. Relashoná ku petishon di Direktor di Direktorado di Kontròl di Riesgo i Maneho pa Kalamidat di dia 18 di oktober 2022 pa loke ta trata ]prolongashon di e término pa por entregá un raportahe di evaluashon tokante krísis di Covid, Konseho di Minister ta bai di akuerdo ku e siguiente puntonan:

1. 1. Prolongashon di e término segun artíkulo 8, insiso 6, di e Dekreto Nashonal Maneho di Desaster i Krísis pa por entregá e raportahenan di evaluashon tokante COVID i òrkan Bonnie pa mas tardá 1 di yüli 2023;
   2. Pa informá Parlamento di e prolongashon akí pa medio di un karta den konsepto di Promé Minister.

Esaki tumando na konsiderashon konseho di Direktor di Kontròl di Riesgo i Maneho pa Kalamidat di dia 18 di òktober 2022. Na Minister di Asuntunan General pa hasi entrega di e karta akí na Parlamento.

Ministerio(nan) responsabel: Ministerio di Asuntunan General.

4. Konseho di Minister ta bai di akuerdo pa duna personal di gobièrnu, te kaminda e servisio permití, liber riba djabièrnè 17 di febrüari 2023 for di 12’or di mèrdia i riba djamars 21 di febrüari 2023 for di 12’or di mèrdia, relashoná ku Marcha Tiner respektivamente Gran Marcha di Despedida.

Esaki tumando na konsiderashon konseho di Direktor di Organisashon di Maneho di Rekurso Humano i Desaroyo di Organisashon i konforme proposishon di Minister di Maneho di Gobernashon, Planifikashon i Servisio Públiko di dia 15 di febrüari 2023.

Ministerio(nan) responsabel: Ministerio di Maneho di Gobernashon, Planifikashon i Servisio Públiko.

MAS NOTISIA