Publiká riba 18 Ougùstùs 2022
Desishonnan relashoná spesífikamente ku asuntunan di pais riba nivel nashonal di djárason, 17 di ougùstùs 2022:
1. Relashoná ku e dokumento tokante e trayekto pa optimalisá Sentro di Detenshon i Korekshon Kòrsou (SDKK), Konseho di Minister a bai di akuerdo pa:
Minister di Hustisia ta responsabel pa adaptá e dekreto nashonal den konsepto.
Pa mas informashon tuma kontakto ku ministerio di Hustisia.
2. Konseho di Minister ta bai di akuerdo ku e proposishon di dia 15 di ougùstùs 2022 pa lanta un grupo di guia i tarea enkargá ku tareanan manera menshoná den e dokumento tokante e trayekto pa optimalisá e servisio di seguridat di Kòrsou, fechá 8 di ougùstùs 2022. Den e kuadro akí minister di Hustisia ta responsabel pa konsipiá un dekreto nashonal.
Pa mas informashon tuma kontakto ku ministerio di Hustisia.
3. A disidí pa presentá e konseho di Sekretario General di ministerio di Salubridat Públiko, Medio Ambiente i Naturalesa riba e dekreto nashonal den konsepto pa konsiderá ‘Monkeypox’ komo un malesa kontagioso, na Direktorado di Lei i Kasonan Hurídiko pa risibí konseho riba esaki.
Pa mas informashon tuma kontakto ku ministerio di Salubridat Públiko, Medio Ambiente i Naturalesa.
4. A bai di akuerdo pa lanta un grupo di trabou enkargá ku e maneho pa pèrmití gruponan spesial (Toelatingsbeleid Bijzondere Groepen), ku lo konsehá e ministernan tokante dunamentu di pèrmit na algun estranhero ku sierto ekspertisio (konosementu i eksperensia) pa por drenta Kòrsou. Di e forma akí alabes a bai di akuerdo ku e dokumento presentá.
Pa mas informashon tuma kontakto ku ministerio di Finansa.
5. Pa loke ta trata e programa finansiá pa Union Oropeo (Meerjarig Indicatief Programma), Konseho di Minister a aprobá e diferente puntonan ku ta bini dilanti den e memorando di dia 16 di ougùstùs 2022. Entre otro a bai di akuerdo ku kontenido di e memorando i tambe algun puntonan spesífiko ku tabatin aden pa diskutí riba dje.
Pa mas informashon tuma kontakto ku ministerio di Asuntunan General.
6. Konseho di Minister ta bai di akuerdo ku e konseho di direktor di Direktorado di Lei i Kasonan Hurídiko fechá 16 di ougùstùs 2022, riba kontenido di e areglo ministerial tokante Makutu Básiko 2022.
Pa mas informashon tuma kontakto ku ministerio di Asuntunan Ekonómiko.
7. Konseho di Minister ta aprobá e dekreto nashonal den konsepto pa lanta un Komishon Zona Ekonómiko enkargá ku preparashonnan pa yega na sierto lei.
Pa mas informashon tuma kontakto ku ministerio di Asuntunan General.