Publiká riba 21 Novèmber 2025
Desishonnan relashoná spesífikamente ku asuntunan di pais riba nivel nashonal di djárason, 19 di novèmber 2025:
1. Lantamentu di un Grupo Interministerial pa Seguridat di Alimento (Ministerio di Desaroyo Ekonómiko)
Konseho di Minister a aprobá lantamentu di un Grupo Interministerial pa Seguridat di Alimento. E grupo di proyekto akí lo enfoká riba garantisá seguridat di aksesibilidat di alimento na Kòrsou i koperashon entre e ministerionan enbolbí.
2. Akuerdo nobo di maneho di Brionplein 2025–2028 (Ministerio di Tráfiko, Transporte i Planifikashon Urbano)
Konseho di Minister a aprobá e akuerdo di maneho entre Pais Kòrsou i Sosiedat di Komersiantenan di Otrobanda (SKO) pa maneho di Brionplein pa 3 aña largu (2025-2028). Minister di Tráfiko, Transporte i Planifikashon Urbano ta outorisá pa firma e akuerdo na nòmber di Pais.
3. Kòrsou na kaminda pa bira miembro asosiá di CARICOM (Ministerio di Asuntunan General)
Konseho di Minister a bai di akuerdo ku instrukshon na Minister Plenipotensiario pa aprobá e tratado entre Reino Hulandes i Komunidat Karibense (CARICOM) riba e kondishonnan pa miembresia asosiá di Kòrsou, durante e reunion di Konseho di Minister di Reino riba 21 di novèmber 2025.
4. Aprobashon di tratadonan di seguridat nuklear (Ministerio di Asuntunan General)
Konseho di Minister a bai di akuerdo ku instrukshon na Minister Plenipotensiario pa aprobá firmamentu di protokòl i tratadonan adishonal riba tereno di seguridat nuklear, durante e reunion di Konseho di Minister di Reino riba 21 di novèmber 2025.
