Publiká riba 04 Aprel 2025
Desishonnan relashoná spesífikamente ku asuntunan di pais riba nivel nashonal di djárason, 2 di aprel 2025:
1. Karta risibí di Gobernador tokante petishon pa retiro di Gabinete Pisas II (Promé Minister di Kòrsou).
Konseho di Minister a tuma nota di e karta di Gobernador fechá 20 di mart 2025 ku tópiko “Petishon pa retiro di Gabinete II bou di konsiderashon”, presentá pa Promé Minister riba 26 di mart 2025.
2. Konseho tokante instrukshonnan na Minister Plenipotensiario relashoná ku reunion di Konseho di Minister di Reino ku a tuma lugá 29 di novèmber 2024 riba e akuerdo di visa Surinam-Benelux (Minister di Asuntunan General)
Konseho di Minister ta di akuerdo ku aplikashon na Kòrsou di e Akuerdo entre Repúblika di Sürnam i paisnan di Benelux tokante anulashon di e obligashon pa un visa pa tenedónan di un pasaporte diplomátiko òf di servisio bálido. E desishon akí a wòrdu tumá den konsiderashon ku konseho di Direktor di Direktorado di Relashonnan Eksterior di dia 25 di novèmber 2024.
3. Konseho tokante instrukshon na Minister Plenipotensiario riab e ‘terug- en overnameovereenkomst’ entre Sürnam i paisnan Benelux (Minister di Asuntunan General)
Konseho di Minister a aprobá aplikashon na Kòrsou di e ‘terug- en overnameovereenkomst’ di personanan ku ta keda ilegalmente riba teritorio, entre Repúblika di Sürnam i paisnan di Benelux (Reino di Bélgika, ‘Groothertogdom’ di Luxemburg i Reino Hulandes). E desishon akí ta basá riba konseho di Direktor di Direktorado di Relashonnan Eksterior fechá 25 di novèmber 2024.
4. Ekstenshon di e akuerdo di koperashon ku Phae Affairs pa e proyekto GT CUR II (Minister di Asuntunan General)
Konseho di Minister a bai di akuerdo ku e siguiente puntonan:
Banda di esaki, Konseho di Minister ta bai di akuerdo pa entregá e dekreto nashonal den konsepto na Gobernador pa firma.
E desishonnan akí ta basá riba e petishon di Minister di Asuntunan General di dia 31 di mart 2025, e petishon di Direktor di Direktorado di Lei i Asuntunan Hurídiko di dia 24 di mart 2025 i konseho di e Kontroladó Finansiero di Ministerio di Asuntunan General di dia 28 di mart 2025.
5. Proposishon pa kambio di e Dekreto Nashonal riba remedi den paki (Minister di Salubridat Públiko, Ambiente i Naturalesa)
Konseho di Minister a bai di akuerdo ku kontenido di e dekreto nashonal den konsepto ku ta kontené medidanan general pa kambia e Dekreto Nashonal riba remedi den paki, i entrega di esaki na Gobernador pa firma. A tuma e desishon akí di akuerdo ku e proposishon di Minister di Finansa di 31 di mart 2025.
