Desishonnan di djárason 20 di mart 2024
Publiká riba 22 Mart 2024
Desishonnan relashoná spesífikamente ku asuntunan di pais riba nivel nashonal di djárason, 20 di mart 2024:
1. Ofresimentu di dokumentu di desishon “Trayekto di optimalisashon di FKA” (Minister di Salubridat Públiko, Medio Ambiente i Naturalesa)
Konseho di Minister ta aprobá e siguiente puntonan:
- Lo kuminsá un trayekto pa disolvé Fundashon Kuido di Ambulans (FKA).
- Lo lanta un organisashon di ehekushon nobo den Ministerio di Salubridat Públiko, Medio Ambiente i Naturalesa.
- E organisashon di ehekushon nobo lo wòrdu inkorporá den e trayekto di ‘Verbeteren Functioneren Overheid’ (VFO) di Ministerio di Salubridat Públiko, Medio Ambiente i Naturalesa.
- Lo prepará statütnan sosial pa faslitá e transishon di empleadonan pa e organisashon nobo.
- Lo desaroyá strategianan pa oumentá entrada òf baha gastunan, pa sigurá ku e servisio nobo di ambulans, parti di e organisashon menshoná, keda salú finansieramente sin karga èkstra riba e presupuesto di Kòrsou.
E tuma e desishon akí basá riba proposishon di Minister interino di Salubridat Públiko, Medio Ambiente i Naturalesa di 14 di mart 2024, tumando na kuenta tambe konseho di e Inspektor General interino di Salubridat i tambe di direktor interino di Maneho Finansiero i Maneho di Presupuesto, ámbos di 7 di mart 2024.
2. Petishon pa un “Host Agreement International Conference Tourism & Leisure Studies 2025” (Minister di Desaroyo Ekonómiko)
Konseho di Minister ta aprobá e siguiente desishonnan:
- Aprobashon di kontenido di e dokumentu añadí titulá “Host Agreement International Conference Tourism & Leisure Studies 2025” dor di Tourism & Leisure Studies Research Network, Universidat di Kòrsou i Curaçao Tourism Development Foundation.
- Outorisashon di Minister di Desaroyo Ekonómiko pa, na nòmber di Kòrsou, firma e akuerdo den konsepto menshoná bou di punto 1.
E desishonnan akí ta basá riba petishon di Minister di Desaroyo Ekonómiko di 15 di mart 2024. Tambe a disidí pa ofresé e dekreto nashonal den konsepto na Gobernador pa keda firmá.
