Publiká riba 23 Mei 2025
Desishonnan relashoná spesífikamente ku asuntunan di pais riba nivel nashonal di djárason, 21 di mei 2025:
1. Proposishon pa un akuerdo di hür pa espasio di ofisina pa Hunta di Konseho (Minister di Asuntunan General)
Konseho di Minister a aprobá e akuerdo di hür proponé entre Pais Kòrsou i Jadi Offices and Apartments pa uso di e edifisio di ofisina na Architectenweg no. 1, 1A, 1B, 1C i 1D. E edifisio lo wòrdu di hür pa un periodo di tres aña, for di 1 di desèmber 2025 te ku 30 di novèmber 2028, na benefisio di e Hunta di Konseho.
E Sekretario di Hunta di Konseho ta outorisá pa firma e akuerdo di hür na nòmber di Pais Kòrsou. Tambe a keda palabrá pa entregá konsepto di e dekreto nashonal na Gobernador pa firma. E desishon akí a wòrdu tumá a base di e petishon di Minister di Asuntunan General fechá 13 di mei 2025 i e petishon di Sekretario di Hunta di Konseho fechá 9 di mei 2025.
2. Revishon di EOP Coral Estate ku Reliant Realty N.V. (Minister di Tráfiko, Transporte i Planifikashon Urbano)
Konseho di Minister a bai di akuerdo pa inisiá e proseso pa un revishon parsial di e Plan di Desaroyo Insular (EOP) pa e área di Coral Estate. Tambe a aprobá kontenido di e akuerdo den konsepto riba e asuntu akí ku Reliant Realty N.V.
Minister di Tráfiko, Transporte i Planifikashon Urbano ta outorisá pa firma e akuerdo en konsepto akí na nòmber di Pais Kòrsou. A tuma e desishon a base di e proposishon di Minister di Tráfiko, Transporte i Planifikashon Urbano di 13 di mei 2025, teniendo kuenta ku e konseho di Direktor di Sektor di Infrastruktura i Planifikashon Urbano.
Banda di esaki a keda palabrá pa entregá konsepto di e dekreto nashonal na Gobernador pa firma.
3. Akuerdo di maneho ku Aspafiko riba koperashon ku Pais (Minister di Enseñansa, Siensia, Kultura i Deporte)
Konseho di Minister a aprobá e proposishon di Minister di Enseñansa, Siensia, Kultura i Deporte di 12 di mei 2025 riba konklushon di un akuerdo di maneho ku Asosiashon Paso Fino Kòrsou (Aspafiko). E akuerdo akí ta kontené akuerdonan tokante maneho, mantenshon i uso di un tereno na Sapaté pa aktividatnan deportivo i rekreativo.
Tantu Minister di Enseñansa, Siensia, Kultura i Deporte komo Minister di Tráfiko, Transporte i Planifikashon Urbano ta outorisá pa firma e akuerdo akí na nòmber di Pais Kòrsou. Tambe a keda palabrá pa entregá konsepto di dekreto nachonal na Gobernador pa firma.
4. Proposishon pa areglo mutuo riba e símbolo di moneda di e florin karibense (Minister di Finansa)
Konseho di Minister a aprobá kontenido di e areglo proponé entre Kòrsou i Sint Maarten pa loke ta trata e símbolo di moneda di e florin karibense. E asina yamá areglo mutuo akí ta basá riba artíkulo 38, promé insiso, di e Statüt pa Reino Hulandes. A tuma e desishon a base di e proposishon di Minister di Finansa interino fechá 9 di mei 2025 i e konseho di Direktor interino di Direktorado di Lei i Asuntunan Hurídiko fechá 27 di mart 2025.
5. Proposishon pa kambia e Areglo di Vakashon i Dispensashon di Servisio pa ámtenarnan pa motibu di oumento di ‘vakantieuitkering’ (Minister di Maneho di Gobernashon, Planifikashon i Servisio Públiko)
Konseho di Minister a tuma nota di e desishon anterior di Konseho di 14 di mei 2025 i ta disidí:
E desishon akí a wòrdu tumá di akuerdo ku e proposishon di Minister di Maneho di Gobernashon, Planifikashon i Servisio Públiko di 13 di mei 2025 i konseho di e Direktor di Direktorado di Lei i Asuntunan Hurídiko di 8 di mei 2025.
6. Konseho riba e rapòrt Dekreto di Sanshon Omnibus Kòrsou (Minister di Asuntunan General)
Konseho di Minister a disidí di bai di akuerdo ku e desishon di konseho ku a tuma anteriormente riba 19 di mei 2025. E desishon akí ta konserní aprobashon di e rapòrt i e dekreto nashonal den konsepto ku medidanan general. E medidanan akí ta wòrdu ehekutá di akuerdo ku artíkulo 2 di e Lei di Sanshonnan Nashonal i artíkulo 2 i 5 di e Lei di Sanshonnan, tambe konosí komo dekreto di Sanshonnan Omnibus Kòrsou.
E konsepto di dekreto nashonal ta wòrdu entregá na Gobernador pa aprobashon. E desishon aki a wòrdu tumá a base di e konseho di 8 di mei 2025 di direktor di Legislashon i Asuntunan Hurídiko i e petishon di 21 di mei 2025 di Minister di Asuntunan General.
7. Konseho riba e dekreto nashonal den konsepto pa nombramentu di supervisor di akuerdo ku artíkulo 11, promé insiso, di e Lei di Sanshon (Minister di Asuntunan General)
Konseho di Minister ta aprobá e dekreto nashonal den konsepto pa nombramentu di supervisor di akuerdo ku artíkulo 11, insiso 1, di e Lei di Sanshon. E diseño akí lo keda entregá na Gobernador pa aprobashon. E desishon akí a wòrdu tumá a base di e konseho di e Direktor di Direktorado di Lei i Asuntunan Hurídiko fechá 8 di mei 2025 i proposishon di e Minister di Asuntunan General di 21 di mei 2025.
