Desishonnan di djárason 22 di yüli 2026

Desishonnan relashoná spesífikamente ku asuntunan di pais riba nivel nashonal di djárason, 22 di yüli 2026:

1.  Presentashon di e dokumento “Position Paper Ruimtelijke Economische Strategie voor Curaçao 2040 (Ministerio di Tráfiko, Transporte i Planifikashon Urbano)
Konseho di Minister a aprobá e kontenido di e “Position Paper 2040 Ruimtelijke Economische Strategie voor Curaçao 2040”, ku ta sirbi komo punto di salida pa elaborá mas aleu i konsulta públiko ku ‘stakeholdernan’, bou di e kondishon ku na momentu di finalisashon di e fase di konsulta, lo presentá un strategia definitivo ku ta inkluí un agènda di implementashon, planifikashon, implikashonnan di bon maneho, konsekuensianan finansiero i kuadronan di monitoreo definitivo di nobo na Konseho di Minister.

2. Publikashon di teksto kontinuo di e Dekreto Gubernamental di 11 di yüni 2025, no. 25/1424 (Ministerio di Asuntunan General)

Konseho di Minister a aprobá un desishon ya tumá ‘op stuk’ ku ta kontené e dekreto ministerial di Minister di Asuntunan General (AZ) tokante publikashon den Landscourant di e teksto kontinuo di e Dekreto Gubernamental di 11 di yüni 2025, no. 25/1424. Ta entregá e dekreto ministerial na Direktorado di Lei i Kasonan Hurídiko (WJZ) pa prosesamentu atministrativo.

3. Registrashon di instrukshonnan ya tumá ‘op stuk’ pa Reunion di Konseho di Minister di Reino di dia 26 di yüni 2026 (Ministerio di Asuntunan General)

Konseho di Minister ta bai di akuerdo pa registrá e desishonnan ya tumá ‘op stuk’, ku instrukshonnan na Minister Plenipotensiario di Kòrsou pa Konseho di Minister di Reino di 26 di yüni 2026. E instrukshonnan aki ta enserá:

• e karta di Parlamento tokante e kompromiso ku e Presidensia di Konseho di Oropa (Raad van Europa);
• e Tratado tokante kambio di normanan ku ta resultá di e rekonosementu di un ambiente di trabou ‘safe’ i saludabel komo un prinsipio fundamental: Genève, 12 di yüni 2023 (Trb. 2023, 144);
• e Tratado entre Reino Hulandes i Federashon di Saint Kitts i Nevis tokante delineashon marítimo; Basseterre, 04 di aprel 2024 (Trb. 2024, 64);
• e Tratado di Nashonnan Uní (ONU) kontra kriminalidat sibernétiko; Fortalesé koperashon internashonal pa kombatí sierto delitonan penal i pa kompartí evidensia di esaki den forma elektróniko pa loke ta trata delitonan penal serio;
• e Tratado di Konseho di Oropa pa Protekshon di e Profeshon di abogado; Luxemburg, 13 di mei 2025 (Trb. 2025, 47);
• e proposishon pa revoká e Lei di Reino di 10 di febrüari 2017 ku ta kontené reglanan tokante revokashon di nashonalidat hulandes na bienestar di seguridat nashonal, i pa kambia e Lei di Servisio di Inteligensia i Servisionan di Seguridat 2017.

4. Protokòl tokante e aserkamentu gubernamental di kriminalidat organisá i debilitante den e paisnan karibense di Reino (Ministerio di Hustisia)

Konseho di Minister a bai di akuerdo ku e kontenido di e Protokòl tokante e aserkamentu gubernamental pa kriminalidat organisá i debilitante den e paisnan karibense di Reino i pa outorisá Minister di Hustisia pa firma e protokòl aki na nòmber di e entidat hurídiko públiko Kòrsou. Lo entregá un konsepto di e Dekreto Gubernamental na Gobernador pa firma.

5. Profilnan revisá pa e miembronan di Hunta di Komisarionan di Buskabaai N.V. (Ministerio di Asuntunan General)

Konforme konseho di Direktor di Fundashon Ofisina pa Supervishon i Standardisashon di Entidatnan di Gobièrnu (SBTNO), Konseho di Minister a aprobá e profil revisá pa e miembronan di Hunta di Komisarionan di Buskabaai N.V., ku ta konsistí di e siguiente profilnan:

• eksperto finansiero
• eksperto hurídiko
• eksperto tékniko-komersial.

6. Inisiativa di konsepto di Ordenansa Nashonal riba penshun Básiko Obligatorio (Ministerio di Desaroyo Sosial, Labor i Bienestar)

Konseho di Minister a bai di akuerdo pa entregá un inisiativa di konsepto di Ordenansa Nashonal riba penshun básiko obligatorio via Gobernador na Konseho di Konsulta (Raad van Advies) pa konseho.

7. Konsepto di Ordenansa Nashonal ku ta establesé e kuentanan anual di Kòrsou pa e añanan finansiero 2020, 2021, i 2022 (Ministerio di Finansa)

Konseho di Minister a bai di akuerdo ku e kontenido i e entrega di tres konsepto di Ordenansa Nashonal ku ta establesé e kuentanan anual di Kòrsou pa e añanan finansiero 2020, 2021, i 2022, via Gobernador na Staten pa tratamentu.

MAS NOTISIA