Desishonnan di djárason 23 di novèmber 2022 - Informashon tokante Gobièrnu di Kòrsou

buska un dokumento

Desishonnan di djárason 23 di novèmber 2022

 

Desishonnan di djárason 23 di novèmber 2022

Publiká riba 25 Novèmber 2022

Desishonnan relashoná spesífikamente ku asuntunan di pais riba nivel nashonal di djárason, 23 di novèmber 2022:

1. Konseho di Minister ta bai di akuerdo pa dokumentá e desishon ku ya a tuma riba 27 di òktober 2022, relashoná ku un karta fechá 28 di òktober 2022 ku a bai pa presidente di CGOA (Centraal Georganiseerd Overleg in Ambtenarenzaken) tokante un proposishon kon poko poko eliminá e redukshon di 12.5% riba kondishonnan laboral, un kalkulashon di e ‘loontrede’ 2022 i tambe e lùmpsùm di 3% plùs indeksashon.

Ministerio(nan) responsabel: Ministerio di Gobernashon, Planifikashon i Servisio Públiko.

2. Konseho di Minister ta bai di akuerdo pa outorisá Sekretario General interino di Ministerio di Gobernashon, Planifikashon i Servisio Públiko pa – na nòmber di Kòrsou komo persona hurídiko públiko – firma e ‘mantelovereenkomst’ den konsepto entre Ministerio di Gobernashon, Planifikashon i Servisio Públiko i CORE N.V. relashoná ku dunamentu di servisio pa e periodo 2022-2024. Esaki konforme petishon di Minister di Gobernashon, Planifikashon i Servisio Públiko di dia 15 di novèmber 2022 di akuerdo ku konseho di Direktor di Sektor di Maneho Finansiero i Maneho di Presupuesto di dia 12 di òktober 2022.

Tambe Konseho di Minister ta bai di akuerdo pa presentá e dekreto nashonal den konsepto na Gobernador pa firma.

Ministerio(nan) responsabel: Ministerio di Gobernashon, Planifikashon i Servisio Públiko.

3. Konseho di Minister ta bai di akuerdo ku e instrukshon den konsepto na Minister Plenipotensiario relashoná ku e reunion di Konseho di Minister den Reino planiá pa 25 di novèmber 2022, den kuadro di e akuerdo entre e paisnan di Benelux i Repúblika Kirgiska tokante tuma na enkargo e fluho di persona ku di forma iregular ta drenta òf keda ku protokòl di ehekushon. Esaki konforme petishon di Minister di Asuntunan General di dia 16 di novèmber 2022 i konseho di Direktor di Relashonnan Eksterior di dia 16 di novèmber 2022.

Ministerio(nan) responsabel: Ministerio di Asuntunan General.

4. Konseho di Minister ta bai di akuerdo ku e instrukshon den konsepto na Minister Plenipotensiario relashoná ku e reunion di Konseho di Minister den Reino planiá pa 25 di novèmber 2022, den kuadro di e tratado internashonal ku a inisiá riba 3 di mei 1996 na Londres tokante e responsabilidat i indemnisashondi daño i perhuisio na momentu ku transportá stòfnan dañino riba laman. Esaki konforme petishon di Minister di Asuntunan General di dia 15 di novèmber 2022 i konseho di Direktor di Relashonnan Eksterior di dia 15 di novèmber 2022.

Ministerio(nan) responsabel: Ministerio di Asuntunan General.

5. Konseho di Minister ta bai di akuerdo ku e instrukshon den konsepto na Minister Plenipotensiario relashoná ku e reunion di Konseho di Minister den Reino planiá pa 25 di novèmber 2022, pa loke ta trata e esfuersonan di Reino pa ku e di 15 konferensha di partido den kuadro di e “Convention on Biological Diversity”. Esaki konforme petishon di Minister di Asuntunan General di dia 16 di novèmber 2022 i konseho di Direktor di Relashonnan Eksterior di dia 16 di novèmber 2022.

Ministerio(nan) responsabel: Ministerio di Asuntunan General.

6. Konseho di Minister ta bai di akuerdo ku e instrukshon den konsepto na Minister Plenipotensiario relashoná ku e reunion di Konseho di Minister den Reino planiá pa 25 di novèmber 2022, den kuadro di e akuerdo entre e paisnan di Benelux i Belize tokante tuma na enkargo e fluho di persona ku di forma iregular ta drenta òf keda ku protokòl di ehekushon. Esaki konforme petishon di Minister di Asuntunan General di dia 16 di novèmber 2022 i konseho di Direktor di Relashonnan Eksterior di dia 16 di novèmber 2022.

Ministerio(nan) responsabel: Ministerio di Asuntunan General.

7. Konseho di Minister ta bai di akuerdo ku e instrukshon den konsepto na Minister Plenipotensiario relashoná ku e reunion di Konseho di Minister den Reino planiá pa 25 di novèmber 2022, pa aprobá entregá di e raportahe bianual (yanüari-yüni 2022) di Kolegio di Supervishon Finansiero na Staten-Generaal, Parlamento i Ministernan di Finansia di Sint-Maarten i Kòrsou, kon tal ku Minister Plenipotensiario ta duna mas splikashon segun e puntonan manera indiká den e instrukshon den konsepto.

Esaki konforme konseho di Direktor di Lei i Kasonan Hurídiko di dia 15 di novèmber 2022.

Ministerio(nan) responsabel: Ministerio di Asuntunan General.

8. Konseho di Minister ta bai di akuerdo ku entrega di un nota den konsepto na Parlamento relashoná ku e raportahe, un di sinku nota di kambio i proyekto adaptá (teksto ku tur kambio) di e dekreto nashonal ku ta trata standarisashon di entradanan haltu na Kòrsou. Esaki konforme konseho di Direktor di Lei i Kasonan Hurídiko di dia 18 di novèmber 2022.

Ministerio(nan) responsabel: Ministerio di Asuntunan General.

9. Relashoná ku petishon di Minister di Desaroyo Ekonómiko relashoná ku e dekreto nashonal den konsepto adaptá pa por lanta e grupo di direkshon i di trabou “Programmaorganisatie Offshore Floating Wind”, Konseho di Minister ta bai di akuerdo ku e siguiente puntonan:

  1. Retirá e dekreto nashonal di dia 14 di novèmber 2022 pa lanta e grupo di direkshon i di trabou;
  2. Kontenido i entrega di e dekreto nashonal den konsepto revisá pa lanta e grupo di direkshon i di trabou.

Esaki konforme petishon di Minister di Desaroyo Ekonómiko di dia 18 di novèmber 2022.

Ministerio(nan) responsabel: Ministerio di Desaroyo Ekonómiko.

10. Konseho di Minister ta bai di akuerdo pa hasi entrega di e dekreto nashonal den konsepto (ku intervenshon di Gobernador) na Konseho di Konsulta pa risibí konseho tokante medidanan general pa por indiká e vírùs di “Monkeypox” komo un malesa kontagioso. Esaki konforme konseho di Direktor di Lei i Kasonan Hurídiko di dia 18 di novèmber 2022.

Ministerio(nan) responsabel: Ministerio di Asuntunan General.

11. Konseho di Minister a tuma nota di e di seis raportahe “Stuurgroep Hervormingen in de Zorgsector” pa e periodo di ougùstùs 2022 ku Minister di Salubridat, Medio Ambiente i Naturalesa a presentá riba 18 di novèmber 2022.

Ministerio(nan) responsabel: Ministerio di Salubridat, Medio Ambiente i Naturalesa.

12. Konseho di Minister ta bai di akuerdo ku kontenido i – ku intervenshon di Gobernador – entrega di e lei den konsepto na Parlamento pa loke ta trata e reglanan di “modellen” (Modellenlandsverordening). Esaki konforme petishon (3 di òktober 2022) i konseho (30 di sèptèmber 2021) di Direktor di Lei i Kasonan Hurídiko, plùs konseho (2 di yüni 2022) di Direktor di “Bureau voor de Intellectuele Eigendom Curaçao”.

Ministerio(nan) responsabel: Ministerio di Asuntunan General.

13. Relashoná ku konseho di Direktor di Bureau Telecommunicatie en Post (BTP) di dia 21 di novèmber 2022 relashoná ku adaptashon di tarifanan di produktonan di kombustibel regulá pa luna di desèmber 2022, Konseho di Minister ta bai di akuerdo ku e siguiente puntonan:

  1. Adaptashon di e tarifanan pa produktonan di kombustibel entrante 29 di novèmber 2022 konforme tabèl 2 ku ta bini dilanti den e konseho i kalkulashon den anekso 1;
  2. Mantenshon di e komponente di tarifa “waarborging brandstofvoorziening 1a’ pa tur produkto di kombustibel konforme desishon di Konseho di Minister di dia 25 di mei 2022;
  3. Mantenshon di bahada temporal di e komponente di tarifa ‘waarborging brandstofvoorziening 1b’ te sero (nihil) pa tur produkto di kombustibel regulá;
  4. Publikashon di e tarifanan nobo (anekso1 i 2.2.);
  5. Determinashon di e areglo ministerial (anekso 3);
  6. Firmamentu i entrega di e karta ku tur anekso korespondiente dirigí na Curoil.

Ministerio(nan) responsabel: Ministerio di Desaroyo Ekonómiko.

14. Relashoná ku konseho di Direktor di Bureau Telecommunicatie en Post (BTP) di dia 21 di novèmber 2022 relashoná ku adaptashon di tarifanan di produktonan di kombustibel regulá pa luna di desèmber 2022, Konseho di Minister ta bai di akuerdo ku e siguiente puntonan:

  1. Klóusula di kombustibel pa luna di desèmber 2022 según e kalkulashonnan den anekso 1 (tabèl 11, rei 2);
  2. Kontinuashon di e komponente di rekuperashon aktual pa aña 2019 den averahe di e tarifa di usuario pa kompensá défisitnan ku a surgi durante 2020, antisipando riba finalisashon di konsulta i tomo di desishon dor di Konseho di Minister pa ku e asuntu akí;
  3. Determiná averahe di e tarifanan pa elektrisidat i awa entrante 1 di desèmber 2022, manera ariba indiká den tabèl A, rei 2;
  4. Publikashon di e tarifanan nobo (anekso1 i 2.2.);
  5. Determinashon di e areglo ministerial (anekso 3);
  6. Firmamentu i entrega di e karta ku tur anekso korespondiente dirigí na Aqualectra.

Ministerio(nan) responsabel: Ministerio di Desaroyo Ekonómiko.

15. Relashoná ku petishon di Minister di Salubridat Públiko, Medio Ambiente i Naturalesa di dia 4 di novèmber 2022 relashoná ku kompra di tres ambulans pa Fundashon Kuido Ambulans Kòrsou (FKAK), Konseho di Minister ta bai di akuerdo ku e siguiente puntonan:

  1. Pa pone e fondonan disponibel asina FKAK por finansiá e tres (3) ambulansnan ku tin mester di dje;
  2. Pa pone e fondonan disponibel den forma di un kontribushon insidental;
  3. Pa pone e kontribushon insidental akí asina FKAK por kumpra e tres ambulansnan, a kargo di e pòst presupuestario “Overig uitbesteed werk”;
  4. Un kambio den presupuesto mester tuma lugá a base di artíkulo 47, insiso 3, di e “Landsverordening comptabiliteit 2010” pa komplementá e pòst presupuestario asina por kumpra e tres ambulansnan, kon tal ku ta inkorporá e kambio den presupuesto akí den e presupuesto supletorio;
  5. Minister di Salubridat Públiko, Medio Ambiente i Naturalesa den diálogo ku Minister di Finansa lo apuntá un kolaborador komo kordinadó di e proseso di kontratashon pa kumpra tres ambulans, kaminda e kordinadó eventualmente lo mèldu kasonan di konflikto di interes inkluso medidanan pa mitigá e situashon akí na Minister di Finansa i Minister di Salubridat Públiko, Medio Ambiente i Naturalesa;
  6. SOAB lo determiná kon mester bai kumpli ku e proseduranan di kontratashon promé ku dunamentu di enkargo.

Esaki konforme proposishon di Minister di Salubridat Públiko, Medio Ambiente i Naturalesa di dia 4 di novèmber 2022 i konseho di Direktor di Sektor di Maneho Finansiero i di Maneho di Presupuesto di dia 28 di òktober 2022.

Ministerio(nan) responsabel: Ministerio di Salubridat Públiko, Medio Ambiente i Naturalesa.

chevron-right-solid-svg MAS NOTISIA
Facebook Facebook