Publiká riba 27 Febrüari 2026
Desishonnan relashoná spesífikamente ku asuntunan di pais riba nivel nashonal di djárason, 25 di febrüari 2026:
1. Akuerdo di maneho pa tereno deportivo Tera Cora (Ministerio di Enseñansa, Siensia, Kultura i Deporte)
Konseho di Minister a bai di akuerdo ku Didi Deeds Foundation por manehá e tereno deportivo na Tera Cora. Alabes ta apoderá Minister di Enseñansa, Siensia, Kultura i Deporte (OWCS) pa firma e akuerdo aki na nòmber di pais. Lo presentá e dekreto korespondiente na Gobernadó pa firma.
2. Perfil i konstelashon direktiva di Algemeen Pensioenfonds Curaçao (Ministerio di finansa).
Konseho di Minister a bai di akuerdo ku konstelashon di direktiva di Algemeen Pensioenenfonds Curaçao (APC). E direktiva lo konsistí di shete miembro, di kual un presidente. Mas aleu e direktiva nobo lo konsistí di un eksperto finansiero, un eksperto den rekurso humano i desaroyo di organisashon, un eksperto hurídiko, un eksperto den atministrashon di empresa, un eksperto den invershon i un eksperto den penshun. E presidente tambe mester ta un eksperto riba un di e terenonan aki.
3. Plan di akshon pa trayekto di estudio pa inspektornan nobo di enseñansa (Ministerio di Enseñansa, Siensia, Kultura i Deporte)
Konseho di Minister a aprobá e plan di akshon pa formashon di inspektornan di enseñansa: ‘Leertraject startende onderwijsinspecteurs’. E trayekto di estudio aki lo tuma lugá di febrüari pa yüli 2026.
4. Kòrsou komo anfitrion pa reunion di ICG tokante di tsunami (Ministerio di Tráfiko, Transporte i Planifikashon Urbano)
Konseho di Minister a bai di akuerdo pa Kòrsou ta anfitrion di e di 19 reunion internashonal tokante tsunami i otro peligernan di kosta den Karibe i besindario (ICG/CARIBE-EWS XIX). E reunion aki lo tuma lugá di 20 pa 24 di aprel 2026. ambe Konseho di Minister a bai di akuerdo ku e kontenido di e akuerdo ku a sera ku e organisashon pa esaki, e asina yamá ‘Host Country Agreement’.
5. Protokòl ku ta trata establesimentu di ‘Koninkrijks Maritieme Administratie’ (Ministerio di Tráfiko, Transporte i Planifikashon Urbano)
Konseho di Minister a bai di akuerdo ku un protokòl di kolaborashon pa establesimentu di un ‘Koninkrijks Maritieme Administratie’. Den e kuadro aki Minister di Infrastruktura i Maneho di Awa di Hulanda, Minister di Turismo, Transporte i Labor di Aruba, Minister di Tráfiko, Transporte i Planifikashon Urbano (VVRP) di Kòrsou i Minister di Turismo i Asuntunan Ekonómiko, Tráfiko i Telekomunikashon di St. Maarten, lo traha huntu riba e tereno di tareanan marítimo i regulashon. Minister di Tráfiko, Transporte i Planifikashon Urbano di Kòrsou ta responsabel pa kordinashon di e trayekto ku lo sigui.
6. Plan di akshon ‘Algemene regels bestuursrecht’(Ministerio di Asuntunan General)
Konseho di Minister a bai akuerdo pa determiná un plan di akshon “Algemene Regels voor Bestuursrecht”. Minister di Asuntunan General ta responsabel pa kordinashon di e trayekto ku lo sigui.
