Desishonnan di djárason 25 di yanüari 2023

Desishonnan relashoná spesífikamente ku asuntunan di pais riba nivel nashonal di djárason, 25 di yanüari 2023:

1. Konseho di Minister ta bai di akuerdo pa entregá e konsepto di lei kual ta konsistí di medidanan relatá na ehekushon di artíkulo 3, insiso tres i kuater, i artíkulo 5, insisio dos, tres i kuater, di e “Landsverordening luchtvaartveiligheidsheffing” (Lei pa método imposishon seguridat di aviashon) na Konseho di Konsulta pa risibí konseho.

Esaki ku intervenshon di Gobernador i konforme konseho di Direktor di Lei i Asuntunan Hurídiko di dia 9 di yanüari 2023.

Ministerio(nan) responsabel: Ministerio di Tráfiko, Transporte i Planifikashon Urbano i Ministerio di Asuntunan General.

2. Relashoná ku e karta di Direktor di Servisio Meteorológiko tokante un raportahe en konekshon ku e avansenan ku a hasi pa ku kandidatura di sr. Martis, kual a keda entregá pa Minister di Tráfiko, Transporte i Planifikashon Urbano riba 18 di yanüari 2023, Konseho di Miniser ta bai di akuerdo ku e siguiente puntonan:

1. A tuma nota di e raportahe entregá dor di Minister di Tráfiko, Transporte i Planifikashon Urbano riba 16 di yanüari 2023 tokante e avansenan ku a keda hasí den kuadro di postulashon di sr. A. Martis pa bira Sekretario-General di World Meteorological Organization (WMO);
2. Pa entregá e kartanan den konsepto kaminda ta anunsiá kandidatura di Kòrsou i alabes ta hasi un petishon pa risibí sosten pa ku esaki durante di elekshon, na Direktor di Direktorado di Relashonnan Eksterior pa evaluá i adaptá segun ta nesesario;
3. Pa Direktor di Direktorado di Relashonnan Eksterior hasi un petishon na Representashon Permanente di Reino na Ginebra pa distribuí e kartanan den konsepto (eventualmente adaptá);
4. Pa pidi Direktor di Direktorado di Relashonnan Eksterior pa huntu ku Representashon Permanente di Reino na Ginebra wak kiko ta e posibilidatnan pa Minister di VVRP tene un enkuentro ku miembronan di WMO durante di su bishita den e siman di 22 pa 25 di febrüari 2023.

Esaki di akuerdo ku karta di Direktor di Servisio Meteorológiko di dia 16 di yanüari 2023.

Ministerio(nan) responsabel: Ministerio di Tráfiko, Transporte i Planifikashon Urbano i Ministerio di Asuntunan General.

3. Konseho di Minister a tuma nota di karta di Sekretario-General di UNESCO Kòrsou titulá “Missie UNESCO Regionale Directeur aan Curaçao”, ku Minister di Enseñansa, Siensia, Kultura i Deporte a entregá riba 19 di yanüari 2023.

Ministerio(nan) responsabel: Ministerio di Enseñansa, Siensia, Kultura i Deporte.

MAS NOTISIA